A janë përdorur për qëllimin e caktuar paratë nga pakoja anti-krizë që duhej të jenë ndihmë për sektorin e turizmit dhe hotelerisë? TV21 arriti deri te disa informacione të pakonfirmuara për keqpërdorim të ndihmës financiare në hoteleri. Bëhet fjalë për keqpërdorimin e parave nga ana e të ashtuquajturave “pronarë të hoteleve” të cilët për rimëkëmbjen e veprimtarisë së tyre kanë marrë ndihmë nga shteti, por në terren nuk ekziston asnjë gjurmë për hotelet e tyre. A është me të vërtetë kështu dhe a ekziston mundësia për keqpërdorim?
Hotelierët që i kontaktoi TV21 nuk i hodhën poshtë tërësisht informacionet e tilla.
“Nuk mund të them se kam informacion, përveç se kishte informacione për keqpërdorime që u dëgjua në opinion me vauçerët që i fituan qytetarët për t’i shfrytëzuar në hotele. Megjithatë kishte spekulime se në hotelieri ka situata të tilla”, theksoi Ana Marija Alleksova – Anëtare e KU pran OE për hoteleri dhe turizëm.
Kryetari i Asociacionit të Hotelierisë së Maqedonisë – HOTAM nuk mundi t’i konfirmojë këto informacione, por tha se ekzistojnë parregullsi në këtë sektor.
“Nuk mund të pohoj duke pasur parasysh se çdo ditë hapen dhe mbyllen hotele. Duhet ta dimë historinë e punës së hoteleve, sa paguan tatim secili . . . Shteti saktë e di cili hotel sa tatim ka paguar dhe kush mund të fitojë mjete dhe grante, ashtu duhet të ndryshohet edhe ndihma…”, deklaroi Kërste Bllazhevski – Kryetar i HOTAM.
Edhe pse nuk ishte decid për ekzistimin e të ashtuquajturve “Hotele fantazmë”, Bllazhevski theksoi parregullsi në sektorin e hotelerisë dhe turizmit.
“Edhe sot jemi dëshmitarë që disa objekte punojnë me dasma të pa paraqitura, festa që janë të ndaluara me ligj, por megjithatë punojnë. Ka dikush që i lë ata të punojnë, të kryejnë ato veprime”, tha kryetar i HOTAM, Kërste Bllazhevski.
TV21 kërkoi listën e hoteleve ekzistuese dhe të atyre që janë rimëkëmbur me marrjen e ndihmës financiare nga shteti. Autoritetet fajin e hedhin nga dera në derë. Së pari na thanë që përgjigje të kërkojmë në Ministrinë e Financave. Nga kjo ministri na orientuan në DAP, që në fund të marrim përgjigje që lejet janë në kompetencë të Sekretariatit të përgjithshëm të Qeverisë. Nga Sekretariati ende presim përgjigje. Nga sektori hotelierik dhe turistik apelojnë që të ketë kontrolle më të mëdha nga ana e shtetit.