Pranë njërës prej Shtatë Mrekullive të Botës së Lashtë, Piramidës së Madhe të Khufusë në Giza, Egjipti ka hapur zyrtarisht atë që synon të jetë një nga pikat kryesore kulturore të epokës moderne.
Një nga tërheqjet kryesore të muzeut do të jetë e gjithë përmbajtja e varrit të paprekur të mbretit djalosh Tutankhamun, të shfaqura së bashku për herë të parë që kur u gjet nga egjiptologu britanik Howard Carter. Ato përfshijnë maskën spektakolare prej ari të Tutankhamunit, fronin dhe objektet e gjetura aty.
Muzeu i Madh Egjiptian (GEM), i përshkruar si muzeu arkeologjik më i madh në botë, është i mbushur me rreth 100,000 objekte që mbulojnë rreth shtatë mijëvjeçarë të historisë së vendit nga kohërat para-dinastike deri në epokën greke dhe romake.
Egjiptologë të shquar argumentojnë se krijimi i tij forcon kërkesën e tyre për kthimin e antikiteteve kryesore egjiptiane të mbajtura në vende të tjera – përfshirë Gurin e famshëm të Rosettës të ekspozuar në Muzeun Britanik.
“Më është dashur të mendoj, si mund ta paraqesim atë në një mënyrë tjetër, sepse që nga zbulimi i varrit në vitin 1922, rreth 1,800 copë nga një total prej mbi 5,500 që ishin brenda varrit ishin në ekspozitë. Më lindi ideja për të shfaqur varrin e plotë, që do të thotë se asgjë nuk mbetet në depo, asgjë nuk mbetet në muze të tjerë, dhe ti përjeton të gjithë përvojën, ashtu siç e kishte bërë Howard Carter më shumë se njëqind vjet më parë”, thotë Dr. Tarek Tawfik, president i Shoqatës Ndërkombëtare të Egjiptologëve dhe ish-kreu i GEM.
Me një kosto prej rreth 1.2 miliardë dollarësh, kompleksi i madh muzeal pritet të tërheqë deri në 8 milionë vizitorë në vit, duke i dhënë një nxitje të madhe turizmit egjiptian.
Përveç ekspozitës së Tutankhamunit do ekspozohet edhe varka spektakolare 4,500-vjeçare e Khufu-së, një nga anijet më të vjetra dhe më të ruajtura nga antikiteti.
Muzeu i ri është kolosal, duke u shtrirë në një sipërfaqe prej 500,000 metrash katrorë. Pjesa e jashtme është e mbuluar me hieroglife dhe alabastër të tejdukshëm të prerë në trekëndësha me një hyrje në formë piramide.
