Hapet, mbyllet dhe sërish hapet “Evzoni” – qindra automjete sot në mëngjes janë kthyer nga kufiri grek

Pas paralajmërimeve të kryeministrit Zoran Zaev në Fejsbuk se vendkalimi “Evzoni” do të hapet sot, shumë qytetarë nga vendi herët në mëngjes u nisën drejt Greqisë.

“Patëm takim të shkëlqyeshëm pune me kryeministrin e Greqisë, Micotakis. Ai më informoi se prej nesër, 14 maj 2021, hapet vendkalimi kufitar “Evzoni” për të gjithë qytetarët e Maqedonisë së Veriut të cilët kanë PCR test negativ, dëshmi me shkrim se kanë pranuar dy doza të vaksinës kundër Covid-19 ose rezultat pozitiv për antitrupa”, tha Zaevi.

Rreth 50 automjete ishin lëshuar në orën 6:15, tregojnë informacionet e mediave serbe që ishin në këtë vendkalim.

“Gjithçka filloi mirë në orën 6:15 kur Greqia lejoi që rreth 50 automjete me targa të ndryshme, bullgare, serbe, të BE-së ose të Maqedonisë, të hyjnë në territorin e Greqisë, kurse pastaj kolona tekstualisht ishte ndërprerë. Filloi kontrollimi i pasaportave dhe tani në “Evzoni” është krijuar kolonë. Ka disa automjete me targa serbe, por këtu janë edhe automjetet nga Maqedonia e Veriut dhe Bullgaria”, tha gazetari i TV “Prva”, Bratisllav Iliq.

Në ndërkohë kërkuam përgjigje edhe nga Ministria e Jashtme e Maqedonisë.

“Me këtë çështje merrem që nga mëngjesi, pasi mora informacion se ka qytetarë tanë që presin në këtë vendkalim kufitar. Tashmë bisedova me të gjitha institucionet e nevojshme dhe informacioni është se duhet vendim zyrtar nga Qeveria greke”, deklaroi ministri, Bujar Osmani.

E informacioni më i ri thotë se vendkalimi kufitar “Evzoni” është sërish i hapur në orën 13.

“Nga ana e autoriteteve greke kufitare morëm njoftim se sot në orën 13 është lejuar hyrja në Republikën e Greqisë për qytetarët e BE-së, të vendeve të treta dhe për qytetarët e Republikës së Maqedonisë së Veriut përmes vendkalimit kufitar “Evzoni”. Sipas protokollit për hyrje, qytetarët e BE-së, të vendeve të treta dhe Maqedonisë së Veriut do të mund të hyjnë në Republikën e Greqisë përmes vendkalimit kufitar “Evzoni” me PCR test negativ jo më i vjetër se 72 orë ose me certifikatë për pranim të dy dozave të vaksinës (të kenë kaluar 14 ditë nga pranimi i dozës së dytë). Do të pranohen të gjitha certifikatat për vaksinimin e kryer, kurse për fëmijët deri në moshën 5 vjeçare nuk nevojitet PCR test”, deklaruan nga MPB-ja.

Kjo masë do të zbatohet deri më 24.05.2021, kurse qytetarët do të mund të hyjnë në Greqi nga ora 07deri në orën 23 (sipas zonës kohore greke) ose nga 06 deri në 22 (sipas zonës sonë lokale), kurse për dalje nga shteti grek nuk ka kufizime. Vendkalimi kufitar “Evzoni” do të punojë 24 orë. Protokolli për automjetet e rënda mbetet i njëjtë.
Për hyrje në Greqi, krahas kushteve të përmendura, duhet 24 orë para udhëtimit ta plotësoni onlajn formularin në linkun travel.gov.gr me qëllim që të reduktohen pritjet në kalimet kufitare.