Grubi mori postin e zëvendëskryeministrit, “Me Zaevin jemi një, jemi një trup kolektiv dhe do të vendosim bashkërisht”

Para se të shkojnë në Vilën Vodno, pesë  ministrat e BDI-së realizuan koordinim me zëvendëskryeministrin e parë të Qeverisë, Artan Grubi.

Pas koordinimit Grubi u paraqit për media dhe sqaroi se çfarë roli do të ketë në qeveri.

“Fillimisht titulli është më ndryshe. Zëvendëskryeministri i parë. Ai që është zëvendëskryeministër i parë e zëvendëson kryetarin kur ai mungon. Sigurisht se do të punojmë së bashku, ne jemi Qeveri dhe detyra ime do të jetë t’i harmonizoj qëndrimet”, tha Artan Grubi, zëvendëskryeministër.

Duke sqaruar deklaratën që e dha mbrëmë pas votimit të Qeverisë, kur tha se ai dhe Zaev janë një, Grubi tregoi se parim i kësaj Qeverie do të jetë edhe vendimmarrja konsesuale.

“Në marrëveshjen e koalicionit, por edhe në programin qeveritar parimi i konsesualitetit i vendimmarrjes konsesuale, i demokracisë konsesuale, është një nga shtyllat e zbatimit të atij programi. Unë dje i thash kryeministri Zaev se tashmë jemi një. Jemi një trup kolektiv dhe do të vendosim bashkërisht”, u shpreh zëvendëskryeministri Artan Grubi.

Ndërkaq Zaev duke komentuar deklaratën e Grubit, tregoi se dallimet që i kanë pasur dy partitë gjatë fushatës janë tejkaluar pasi kuadri i BDI-së në Qeverinë e re nuk është i inkriminuar.

“Në Qeveri nuk ka kuadro të inkriminuara. Nga gjithsej 6 ministra dhe 11 nga koalicioni “Mundemi” janë të ndershëm dhe të përgjegjshëm. Unë kam dhënë përgjigje, se te ne, ai që vendos është populli. Populli ka vendosur dhe ne u ulëm. Jam ul edhe më tjerët, por më shumë me BDI-në sepse ata i patën numrat. Kemi biseduar dhe i kemi thënë të gjitha vërejtjet, si ne ndaj tyre edhe ata ndaj nesh. Dhe i kemi kaluar dallimet dhe kemi krijuar mirëbesim”, potencoi kryeministri Zoran Zaev.

Grubi bart edhe funksionin e Ministrit të Sistemit Politik dhe paralajmëroi se në këtë përbërje në punë do të rikthehen edhe rreth 1400 administratorët që marrin pagë dhe qëndrojnë në shtëpi.

Për të definuar qartë funksionin dhe kompetencat e zëvendëskryeministrit të parë të qeverisë, ai njoftoi se qysh nesër do të shqyrtohet ndryshimi i Rregullores së punës së Qeverisë.