Zëvendëskryeministri i parë, Artan Grubi, fajin për mospasjen e vaksinave anticovid ia lë vendeve të Bashkimit Evropian. Vendi ka marrëveshje me Fajzer, Sinofarm, Sputnik V dhe me Astra Zeneka, por prioritet kanë vendet e pasura dhe të mëdha. Megjithatë, Grubi shprehet i zhgënjyer nga mungesa e solidaritet të Bashkimit Evropian.
“Të ju them sinqerisht, jam i dëshpëruar nga mungesa e solidaritetit, veçanërisht të Bashkimit Evropian me shtetet e Ballkanit perëndimor në lidhje me vaksinat. Vlerësoj se edhe Ballkani perëndimor është pjesë e një përgjegjësie të madhe të BE-së dhe kjo tregon gabim sistematik në funksionimin e unionit në lidhje me solidaritetin e vendeve anëtare, por edhe me vendet aspirante për anëtarësim”, tha Artan Grubi – zëvendëskryeministër i parë.
Megjithatë Komisioni Evropian ka ndarë shuma milionëshe për luftë kundër pandemisë nga Fondi Solidar i BE-së, për të gjitha vendet-anëtare të BE-së, por edhe vendet-kandidate. Por vendi nuk i ka shfrytëzuar këto mjete sepse nuk i ka plotësuar kushtet për të marrë ndihmë financiare nga ky fond.
“Republika e Maqedonisë së veriut kishte të drejtë, dhe ata fillimisht u janë drejtuar shërbimeve të komisionit me një letër preliminare në të cilën theksohej qëllimi i tyre për të aplikuar, por në fund nuk dërguan kërkesë zyrtare deri në afatin e fundit – 24 qershor”, thanë për TV21 nga Komisioni Evropian.
Nga Qeveria për TV21, dje thanë se kanë marrë vendim për të aplikuar, por pas përpunimit të të dhënave, kanë ardhur në konkluzion se RMV-ja nuk i plotëson kushtet e nevojshme. Deri më tani, në luftën me Kovid 19 BE-ja Maqedonisë i ka dhënë 66 milionë euro të cilat sipas Qeverisë janë shpërndarë për institucionet më kritike që janë në vijën e parë të frontit.