Afatet kanë kaluar, e jo të gjithë administratorët e rishpërndarë kanë nisur me punë. Nga gjithsej 1349, vetëm 650 kanë filluar. Është e dukshme që jo krejt drejtuesit e institucioneve kanë vullnetin për t’iu bërë vend të gjithëve.
Në Inspektoratin e Tregut, drejtori Stojko Paunovski pohoi se është i sigurt se për 35 të rishpërndarët, nuk ka as vend e as kushte! Problem përbën shkollimi. Ai kërkon juristë e ekonomistë, e që këtë shkollë e kanë vetëm 12 nga 35-të rishpërndarët.
“Nuk mundem të ndryshoj sistematizim që dikush pa shkollimin adekuat, të mos i plotësojë kushtet e veçanta për punësim në Inspektoratin Shtetëror të Tregut, të hap vende të tilla e pas një kohe të njëjtat t’i ndërpresim, bëj edhe unë shkelje, ndoshta bëj edhe vepër penale”, deklaroi Stojko Paunovski – drejtor i Inspektoratit të Tregut.
Ministri për Sistem Politik dhe Marrëdhënie mes Bashkësive, Artan Grubi, është i kënaqur nga ecuria e shpërndarjeve. Thotë se të pakta janë institucionet që bëjnë komente si ato të Paunovskit, të cilit thotë se do t’i ndihmojë me juristë e ekonomistë.
“Gjithsesi, po që se kemi më shumë jurist dhe ekonomist, me një ndryshim të vogël të planit do të dërgojmë që t’i plotësojmë nevojat e Inspektoratit. Keni parë edhe vetë se as ai nuk heziton që t’i merr administratorët, kërkon edhe më tepër po që se ka të tillë që i përmbushin kushtet”, theksoi Artan Grubi – ministër për Sistem Politik dhe Marrëdhënie mes Bashkësive.
Puna ka ngecur edhe në Drejtorinë për të Ardhura Publike. Zv/drejtori Abdul-Selam Selami thotë se sapo është ndryshuar sistematizimi i brendshëm dhe së shpejti të rinjtë pritet të nisin me punë.
“Para 2 javësh kemi marrë sistematizimin e ri, punohet në përgatitjen e vendimeve dhe shpresoj se së shpejti do ja fillojnë punën. Numri i përgjithshëm është 101 punonjës administrativ”, theksoi për TV21, Abdulselam Selami – zëvendësdrejtor i DAP.
Me punë nuk kanë nisur as 137 të rishpërndarët në Ministrinë e Brendshme. Këtu ka një procedurë shtesë, kontrollohet pastërtia e figurës. Zv/ministri Nazim Bushi shprehet se emrat ende janë në Agjencinë për Siguri Kombëtare.
“Emrat e 137 administratorëve të rishpërndarë në MPB ende janë në ASK për të kontrolluar pastërtinë e figurës së tyre. Pritet përgjigje. Afat konkret për përfundimin e procesit nuk është dhënë, por nga MPB është kërkuar që të jenë me prioritet në procesin e kontrollit”, tha për TV21 Nazim Bushi – zëvendësministër i Punëve të Brendshme.
E nëse në disa institucione ka ngecje, në drejtorinë e Doganave, 74 administratorë tashmë kanë nisur punë, tregon për TV21 zëvendësdrejtori Irfan Buçi.
“Bëra ndryshimin e sistematizimit dhe në afat prej 15 ditësh i përfundova te gjitha procedurat! Në doganë gjithsej janë transferuar 74 administratorë. Me punë kanë filluar që nga 1 marsi”, deklaroi për TV21, Irfan Buçi – zëvendësdrejtor i Doganave.
Ministri Grubi pret që procedura e rishpërndarjes të përfundojë deri në rebalancin e buxhetit, ku mjetet nga ministria për Sistem Politik duhet të shkojnë institucionet ku kanë nisur me punë administratorët. Ata të punësuar me programin K5 që nuk e pranojnë vendin ku janë sistemuar, kalojnë në listë transferi në Ministrinë e Administratës. Nëse as këtu nuk e pranojnë ofertën e parë, atëherë mbeten pa vend pune.