Gjykimi për rastin “Titanik” vazhdon më 20 maj

Seanca e ardhshme gjyqësore për rastin “Titanik” është paraparë që të vazhdojë më 20 maj. Disa nga dëshmitarët e propozuar nga prokuroria gjatë dëshmimit të sotëm theksuan se nuk kanë kurrfarë njohurish për financimin e partive politike dhe se asnjëherë nuk kanë paguar mjete për partinë.

Procesi gjyqësor për këtë lëndë është ende në fazën e procedurës dëshmuese.

Gjykimi në këtë rast drejtohet nga gjykatësi Osman Shabani, ndërsa aktakuza përfaqësohet nga prokurorja publike Lile Stefanova.

Përveç ish-kryeministrit Nikolla Gruevski, i cili është arratisur, në rastin “Titanik” akuzohen edhe Kiril Bozhinovski, Mile Janakieski, Gordana Jankuloska, Biljana Brishkoska Boshkovski, Ilija Dimovski, Munir Pepiq, Edmond Temelko, Kiril Todorovski dhe të tjerë. Ata dyshohen për shoqërim kriminal, shkelje të së drejtës për të votuar, shkelje të lirisë së përzgjedhjes së zgjedhësve, ryshfet në zgjedhje dhe votim, shkatërrim të materialit zgjedhor dhe keqpërdorim të mjete për financimin e fushatës zgjedhore.