Gjukanoviq: Mali i Zi iu përgjigj pandemisë në kohë dhe në mënyrë efikase

Presidenti malazez Milo Gjukanoviq deklaroi se vendi kishte treguar në luftën kundër koronavirusit të ri se ishte gati të përgjigjet në kohë të duhur, me kompetencë dhe në mënyrë efikase.

“Përshkrimi i duhur i asaj që kaluam muajin e kaluar është përgjegjësia. Kjo është përgjegjësi shtetërore, profesionale dhe shoqërore. Shteti ka treguar se është në gjendje t’u përgjigjet sfidave të tilla në kohë të duhur, në mënyrë kompetente dhe efikase”, deklaroi Gjukanoviq në emisionin e TVMZ-së.

Sipas tij, Mali i Zi ka treguar gjatë kësaj periudhe se është shumë më i zhvilluar dhe më funksional se sa është paraqitur deri më tani.

“Pandemia ka treguar se sistemi shëndetësor malazez, por edhe sistemi në tërësi është i gatshëm të menaxhojë me pandeminë e koronavirusit”, tha Gjukanoviq dhe shtoi se problemet me furnizimin e pajisjeve janë tejkaluar mirë dhe në mënyrë efektive, ndërsa falënderoj edhe donatorët.

Gjukanoviq theksoi se Mali i Zi kishte nivelin më të ulët të vdekshmërisë në rajon dhe shprehu shpresë se do të mbetej i tillë.

Ai rikujtoi që shteti ka lejuar këdo që dëshiron të kthehet në shtëpi.

“Edhe në këtë gjendje u tregua që jeta është përpara të gjitha temave dhe vlerave të tjera”, theksoi presidenti malazez./MIA