Gjuha shqipe për dikë “therë në sy”! Shkarraviten fjalët shqipe në tabelat e magjistrales së Kërçovës

Pas tabelës në kufirin e Bllacës në të cilën nuk figuronte gjuha shqipe, një ngjarje tjetër po nodhë në Kërçovë në rrugën magjistrale. Në këto tabela fjalët në shqip janë shkarravitur.

Raste të tilla shihen nga stacioni autobusëve e deri në dalje të Kërçovës rrugës drejt Ohrit.

“Ndodhemi në rrugën magjistrale të Kërçovës pikërisht në Drugovë. Në këtë pjesë të Kërçovës janë fshirë mbishkrimet në tabela ku figuron gjuha shqipe, është lënë vetëm gjuha maqedonase dhe gjuha angleze. Siç mund të shihni kjo nuk është tabela e vetme, janë edhe tri ose katër tabela të tjera ku gjuha shqipe tanimë nuk figuron sepse është fshirë”, raporton gazetarja e TV21, Salije Sadiku Pinjolli.

TV21 kërkoi qëndrim  tek Ndërmarrja Publike për mbrojtjen dhe mirëmbajtjen e rrugëve regjionale dhe magjistrale nga ku thanë se do të reagojnë duke i sanuar dhe duke i kthyer në gjendjen e mëparshme, ndërsa për përgjegjësit e kësaj vepre kërkojnë veprim nga institucionet përkatëse.

Ndërkaq zëdhënësi i nga SPB-Ohër Stefan Dimovski  i tha TV21 se rasti është paraqitur dhe dokumentuar në Stacionin Policorë të Kërçovës dhe po merren masa.