Gjermania, e cila në korrik e merr kryesimin gjashtë mujor me BE-në, paralajmëroi se do të angazhohet për qëndrim më të fuqishëm të BE-së ndaj Kinës dhe do të kërkojë reciprocitet në raportet me atë vend, duke i potencuar vlerat e BE-së.
Në projekt-planin e ri të kryesimit gjerman me BE-në, në të cilin pati qasje Rojters, shprehet dëshira për zhvillim të bashkëpunimit me Kinën, si dhe të punohet në reciprocitet më të madh në të gjitha sferat e përfshira me planin, transmeton Tanjug-u.
Përmendja e reciprocitetit është rezultat i ankesave nga kompani gjermane të cilat pohojnë se nuk kanë qasje drejt tregut kinez në masë të njejtë siç iu është lejuar kompanive kineze të punojnë në tregun gjerman.
“Politika e të gjitha institucioneve dhe vendeve anëtare të BE-së ndaj Kinës duhet të unifikohet, baraspeshohet dhe orientohet drejt interesave të përbashkëta afatgjata dhe vlerave të BE-së”, ceket në planin e shkruar në 24 faqe.
Fjala “vlerë” nuk ka ekzistuar në versionin paraprak të planit, të përgatitur në mars, ndërsa përfshirja e saj në dokumentin e ri në mënyrë potenciale sugjeron theks më të fuqishëm në tema si demokracia, të drejtat e njeriut dhe autonomia e Hong-Kongut, komentojnë mediumet evropiane./MIA