Para 2 viteve, në prag të zgjedhjeve lokale, garazhet në kate i premtuan të dy bashkë, zv/kryeministri i parë Artan Grubi dhe kryetari i Çairit, Visar Ganiu, madje e kishin thirrur edhe biznesmenin nga Kosova, Behgjet Pacolli.
Por tash kur në terren nuk ka asgjë nga ky premtim, fajin po ja hedhin njëri-tjetrit. Kryetari i Çairit, Visar Ganiu për vonesat gishtin e drejton nga Qeveria. Shpjegoi se si komunë kanë bërë gjithçka që është dashur, duke shfrytëzuar edhe ligjin për investime strategjike të propozuar nga Qeveria që parasheh investime 8 miliardë euro, por Ganiu thotë se ky ligj ka ngecur në Qeveri.
“Kur e pamë një ligj të tillë, pyetëm që a kemi mundësi ne të inkuadrohemi tek ligji për investime strategjike për shkak se menduam se kemi diku më tepër se 10 pulla të ndërtimit të garazheve në kate dhe ta kalojmë këtë ligj dhe në këtë mënyrë t’i përshpejtojmë ose t’i lehtësojmë procedurat të cilat deri më tani nuk e dimë për çfarë arsye pengohen. Këtë e bëmë në bashkëpunim me Qeverinë. Ata kërkuan nga ne biznes planet dhe studimin fizibiliti të cilat ne i kemi bërë dhe sot mund t’i dokumentojmë që i kemi, mirëpo erdhi një moment ku thanë se ka stagnim të këtij ligji dhe duhet të presim”- deklaroi Visar Ganiu, Kryetar i Komunës Së Çairit.
Ganiu premton se deri në fund të mandatit do të realizohen garazhet në kate. Por për dallim prej tij, zv/kryeministri i parë Artan Grubi në “Click Plus” tha se projekti ka dështuar për faj të komunës së Çairit. Madje për këtë i ka kërkuar falje edhe Pacollit.
TV21: Nuk janë bërë parkingjet!
– E di dhe i kërkova ndjesë z.Pacolli atë ditë kur shkuam me kryetarin në darkë në shtëpinë e tij për të gjithë këtë keqkuptim sepse sa na përket neve, dhamë mbështetjen e plotë, kishte diskutim edhe në Qeveri për të shkuar përpara me këtë projekt nëpërmjet investimeve strategjike.
TV21: Edhe? Shkurt e shqip!
-Po është zero.
TV21: Nuk u bë për faj të kujt? Se realizuat ju?
-Sigurisht që jo për fajin tonë- tha Artan Grubi, Zv/Kryeministër i Parë.
“Është mirë që ka shkuar për t’i kërkuar falje, por është dashur t’i tregoj edhe arsyen e vërtetë se ku qëndron problemi për shkak se ato ligje nuk i sjellim ne po i sjell Qeveria, kalojnë në Kuvend pastaj na mundësohet neve që t’i zbatojmë ose formë që të aplikojmë dhe të përfitojmë nga ai ligj”- deklaroi Visar Ganiu, Kryetar i Komunës së Çairit.
Për kërkim faljen e Grubit, e për dështimin e projektit, TV21 kërkoi përgjigje edhe nga biznesmeni Behgjet Pacolli, si drejtor i kompanisë Mabetex, që kishte nënshkruar memorandum bashkëpunimi për ndërtimin e garazheve në kate, por ky i fundit nuk na u përgjigj.
Mësohet se investitor në këtë projekt është dashur të jetë edhe afaristi Fatmir Etemi, por i pyetur rreth kësaj Etemi na tha se nuk ka qenë i interesuar për projektet e parkingjeve me kate në Çair.
Përndryshe investimi asokohe kapte vlerën prej 50 milionë eurove, e që parasheh ndërtimin e garazheve nëntokësore dhe në kate në Çair, e që përfshinë 3.000 vendparkingje në shumë lokacione të komunës së Çairit.