Fundjavë pa TVSH në fillim të vitit shkollor! Duhet të shmangen manipulimet nga ana e kompanive

Se do të ketë fundjavë pa TVSH si një nga masat anti-krize, edhe atë në fillim të muajit tetor, mbrëmë konfirmoi edhe kryeministri Zoran Zaev, duke i përgjigjur pyetjes së gazetarëve. Megjithatë, siç paralajmëroi, që të realizohet masa për fundjavë pa TVSH duhet të mënjanohen manipulimet nga ana e kompanive.

“Të gjithë duam kjo të ndodhë para fillimit të vitit shkollor. Të gjithë duan të blejnë fletore, veshje për fëmijët, çanta, ka plotë harxhime dhe ne duam ta sigurojmë pikërisht në këtë periudhë. Ky është synimi ynë. Bëhet fjalë për një sistem dhe duhet ta mendojmë mirë që biznesi ta mos keqpërdorë atë. Duhet ta vendosim në funksion. Po tentojmë, nuk mund të them saktë kur do të ndodhë. Por, bëjmë përpjekje të jetë në fund të shtatorit, fundjavën e fundit, me qëllim që më 1 tetor të hyjmë në “TVSH-në time”, tha Kryeministri Zoran Zaev.

Se zbatimi i kësaj mase sjell edhe probleme të caktuara, konsideron edhe profesori universitar, Branimir Jovanoviq. Ai për TV21, dje tha se masa do të shkaktojë zbrazëti në Buxhet dhe do ta stimulojë ekonominë gri.

“Kjo masë më së shumti do të shkojë në favor të të pasurve, sesa të të varfërve. Çfarë mund të blejë një njeri i varfër – ai blen ushqim, veshje, produkte elementare që janë më të lira. Këtu nuk ka tatim të lartë. Kurse njeriu i pasur blen produkte të shtrenjta, kështu që gjatë asaj fundjave do të blejë celularë të shtrenjtë, televizorë, dhe praktikisht shteti do t’i lirojë nga taksa të pasurit, në vend që t’u ndihmojë të varfërve”, tha profesori universitar, Branimir Jovanoviq.

Në paraqitjen e tij të mbrëmshme në servisin publik, kryeministri informoi edhe për çështje të tjera aktuale nga fusha e ekonomisë. Duke folur për gjendjen me BPV-në, tha se ai në tremujorin e dytë është në nivel mesatar, në raport me vendet e rajonit dhe Evropës. Për tremujorin e tretë, kryeministri pret një zero pozitive, kurse për të katërtin, siç u shpreh, pret BPV-ja të jetë nën -4%, projeksion të cilin, sipas Zaevit e ka parashikuar Banka Botërore. Krahas servisimit të rregullt të borxheve, shteti ka edhe rezerva të veta devizore, rikujton Zaevi.   

“Shteti ka rreth 150-200 milionë euro në dispozicion, por kjo nuk do të thotë se ne duhet t’i shpërndajmë këto mjete. Duhet të dimensionojmë aq sa është e nevojshme, sepse kjo do të ndodhë me rebalancin i cili përpilohet nga ana e Ministrisë. Shkurto atje ku nuk duhet shpenzuar, para së gjithash shkurto atje ku të hollat dalin jashtë shtetit. Nuk duhet shkurtuar nga investimet kapitale, sepse ato ofrojnë punë”, deklaroi Zaev.

Zaevi ritheksoi se pakoja e re masash do t’i përfshijë kategoritë më të varfra, me qëllim që të rritet fuqia e tyre e konsumit, por edhe ajo e kompanive që t’i paguajnë rrogat. Do të vazhdojë edhe ndihma për subvencionimin e rrogave në sektorët më të prekur, bëri me dije kryeministri.