Lidhja Social Demokrate e Maqedonisë konfirmoi se mbajnë takime të rregullta me Bashkimin Demokratik për Integrim, mirëpo nuk japin detaje nëse i kanë ofruar BDI-së që të shkojnë me kandidat të përbashkët për president, me lista të përbashkëta në zgjedhjet parlamentare si dhe të mos ketë kryeministër shqiptar gjatë qeverisë teknike. Në këtë ofertë është paraparë të përfshihet edhe Aleanca për Shqiptarët. Siç thonë nga LSDM, mes tyre dhe BDI-së ka takime të rregullta si partner të koalicionit, ndërsa bisedimet do të vazhdojnë edhe në të ardhmen.
“Mes LSDM-së dhe BDI-së ka takime të rregullta, ato janë në fushën e bisedimeve mes partnerëve të koalicionit. Të gjitha opsionet janë të hapura, por, ende është herët për detaje. Bisedimet do të vazhdojnë edhe në të ardhmen”, thonë nga LSDM.
Pjesa e daljes bashkë në zgjedhjet parlamentare nuk është diçka e re. Këtë e pati paralajmëruar edhe vet kreu i BDI-së Ali Ahmeti në intervistën për TV21.
“Unë jam i gatshëm në një listë. Dmth të gjitha partitë shqiptare në një listë, madje sot është teknika..
Të gjitha subjektet politike me ju?
Me ne, me ne, por secili me autonominë e vet. Gjithashtu jemi të gatshëm që ky front për europë, jemi të gatshëm të hyjmë edhe me parti maqedone, në këtë rast LSDM”, u shpreh lideri i BDI-së, Ali Ahmeti.
Sipas informacioneve të TV21, BDI për momentin nuk dëshiron të heqë dorë nga kryeministri shqiptar në 100 ditët e fundit të mandatit. Ahmeti para pak ditësh konfirmoi që kandidati për kryeministër shqiptar do të jetë nga radhët e BDI-së. Nga ana tjetër Aleanca për Shqiptarët vazhdimisht po këmbëngulë që në zgjedhje të shkojë e vetme.
Por sa është e arritshme kjo ofertë? Sipas njohësit të çështjeve politike Xhelal Neziri, kjo është thjeshtë matje pulsi të opinionit por edhe gatishmërisë të BDI-së dhe ASH-së për koalicion parazgjedhor.
“Nuk mendoj se kjo ofertë do të çojë drejtë një koalicioni të tillë siç ka kërkuar LSDM. Më tepër mendoj se është një matje pulsi në opinionin publik por edhe matje të disponimit te BDI dhe ASH se a janë të gatshme që të nisin një proces serioz të negociatave për të formuar një koalicion parazgjedhor. Të gjitha këto aktivitete të partive politike do të shpeshtohen në periudhën që vjen por ne nuk mund të parashikojmë se çfarë rezultatetsh mund të kenë këto negociata ose aktivitete”, theksoi Xhelal Neziri, analist politik.
Përndryshe sipas burimeve jozyrtare të TV21, në rast të realizimit të planit për të dalë bashkë në zgjedhje, BDI do ta merrte bartësin në njësinë e 6-të zgjedhore, ASH-ja vendin e dytë. Në NJZ 1 dhe 2, LSDM-ja do të kishte bartësin e listës, ndërsa pozita e dytë do të rezervohet për ASH-në ose BDI-në.