Franca që sot ngadalë i kthehet normalitetit

Franca prej sot i kthehet normalitetit, duke u larguar gradualisht nga masat e kufizimit të vendosura më 17 mars. Qeveria u bëri thirrje francezëve që të përgatiten, por kuadri ligjor, përkatësisht Ligji për zgjatjen e gjendjes së jashtëzakonshme deri më 10 korrik, nuk është publikuar në kohë në Gazetën Zyrtare për shkak të nevojës që Këshilli Kushtetues të vendosë mbi kushtetutshmërinë e të njëjtit, që i bën disa nga masat e daljes nga izolimi të pazbatueshme, njoftoi korrespondenti i MIA-s.

Me mospublikimin e ligjit para mesnatës, sot vlen vetëm kufizimi i udhëtimit deri në 100 kilometra, ndërsa qeveria, kur e pa problemin, lëshoi një deklaratë pak para mesnatës duke kërkuar “ndjenjë të përgjegjësisë”.

Sipas kësaj kumtese, të publikuar brenda natës, Këshilli Kushtetues, i thirrur për ta shpallur kushtetutshmërinë e ligjit nga presidenti Emanuel Makron, mendimin e tij do ta japë gjatë ditës.

Pas 55 ditëve të kaluara nën kambanë qelqi, Franca sot del nga masat e kufizimit. Kompanitë dhe transporti publik ngadalë po kthehen në normalitet, por jo në aktivitetin e plotë. Shkollat do të fillojnë t’i pranojnë nxënësit nga nesër, por jo të gjithë, por vetëm ata që janë në vështirësi dhe prindërit e të cilëve do ta lejojnë këtë. Sidoqoftë, fjala kujdes është e pranishme tek të gjithë, në mënyrë që të mos rikthehet kurba e epidemisë dhe rasteve të vdekjes, e cila është më e ulëta që nga fillimi i majit.

Në kundërshtim me kthimin në jetën “normale”, për ta ndaluar recesionin ekonomik, gjithnjë e më shumë janë bërë thirrje për t’i kushtuar vëmendje masave paraprake. Duke e marrë parasysh që virusi është akoma këtu, sepse për të nuk ka as ilaç, as vaksinë.

Parlamenti ra dakord dhe e zgjati gjendjen e jashtëzakonshme deri më 10 korrik, duke e miratuar tekstin me të cilin u miratuan masa speciale për monitorimin e pacientëve me Kovid-19. Të dhënat nga ky skedar do të ruhen vetëm për tre muaj. Pesë rajone franceze janë ende në fazën e kuqe të epidemisë, ku virusi po lëvizë me shpejtësi, përfshirë rajonin e Parisit. Në zonat e tjera të gjelbra, ekspertët paralajmërojnë se “asgjë nuk ka mbaruar”. Dy vatra të nxehta të reja janë shfaqur pikërisht në zonat e gjelbra.

Nëse rikthimi në punë dhe aktiviteti ekonomik me hapjen e të gjitha dyqaneve fillon prej sot, ritet fetare në Francë do të jenë në gjendje të mbahen vetëm më 29 maj, nëse situata nuk përkeqësohet deri atëherë./MIA