Para sallës së gjyqit, familjarët e viktimave deklaruan se dyshojnë në mënyrën se si i gjithë rasti është udhëhequr nga Prokuroria Publike, pasi në opinion u shfaqën informacione se shkaku i vdekjes nuk ka qenë vetëm asfiksia nga monoksidi i karbonit. Ata pyesin nëse Prokuroria Publike i ka hetuar shkaqet e sakta të vdekjes së fëmijëve të tyre, pas gjetjeve të Institutit të Kimisë për praninë e gazrave cianidë.
“Fakti që institucionet shtetërore konfirmojnë mundësinë e pranisë së gazrave cianidë në hapësirë, por njëkohësisht nuk ekziston asnjë provë e qasshme publike se këta gazra janë analizuar në trupat e viktimave, paraqet një boshllëk serioz mjekësor dhe juridik. Kjo do të thotë se raporti i autopsisë është i paplotë, ekziston bazë për ekspertizë shtesë dhe të pavarur, si dhe bazë për kontestim juridik të përfundimit, gjë që është e arsyeshme dhe e domosdoshme në interes të së vërtetës”, tha Aleksandar Naunov – prind i një fëmije të ndjerë.
Ndërkohë, në seancën e sotme gjyqësore u paraqit edhe dëshmitari i parë, Dejan Nikollov, pronar i një autoservisi që ndodhej menjëherë pranë diskotekës “Puls” në Koçan. Duke iu përgjigjur pyetjeve të Prokurorisë Publike, ai foli për mënyrën se si ishte rindërtuar objekti i diskotekës. Tha se pronari i tij, Dejan Jovanov, nuk i kishte treguar se çfarë po ndërtohej konkretisht, por më pas, pasi vuri re se po instaloheshin banakë, konstatoi se bëhej fjalë për një objekt hotelerie. Dëshmitari tha gjithashtu se më herët ai objekt kishte funksionuar si konfeksion dhe kishte qenë edhe hapësirë magazinimi për produkte lëkure. Para fillimit të dëshmive, përfunduan fjalët hyrëse të mbrojtjes me paraqitjen si të avokatit ashtu edhe të vetë Aleksandar Nacevit, pronar i agjencisë së sigurimit “Rubikon”, i cili tha se ndaj tij ka shpifje dhe fyerje të pabazuara.
“Edhe vetë një Xhorxh Orvell do të mund t’i kishte zili këto konstruksione. Pikërisht për këtë arsye, gjatë këtij gjykimi do t’i neutralizojmë këto konstrukte përmes provave dhe rrethanave të pakontestueshme që publikisht do të tregojnë mungesën e çdo lloj faji”, pohoi Aleksandar Nacev – i akuzuar.
Gjykimi vazhdon me dëshmitë e 35 dëshmitarëve, ndërsa seanca e ardhshme gjyqësore me dëshmitarë të tjerë është caktuar për të hënën.