Fillon gara për nënshkrimet! Nga gjithsej 9 kandidatë për president, 7 duhet të mbledhin nga 10.000 nënshkrime

Prej sot janë hapur të gjitha njësitë rajonale të Komisionit të Zgjedhjeve, ku qytetarët do të mund ta japin mbështetjen e tyre për ndonjë prej kandidatëve të regjistruar. Njëkohësisht, kandidatët dhe partitë e tyre me deklaratat e tyre fillestare zyrtarisht dalin me thirrje deri te qytetarët që t’ua japin nënshkrimin e tyre. Sot në mëngjes, Arbër Ademi nga BDI, para Vilës presidenciale në Vodno, tha se qytetarët tashmë në mënyrë masive po japin nënshkrimet e tyre për kandidaturën e Bujar Osmanit.

“Pas Kryeministrit të parë shqiptar, zëvendëskryeministrit të parë, Ministrit të jashtëm, atij të Mbrojtjes dhe të Punëve të Brendshme, avokatëve të shtetit dhe të popullit, kryetarëve të gjykatave kushtetuese, supreme, administrative, kryetarët e federatave të futbollit, mundjes dhe boksit, ka ardhur koha që të shtrojmë rrugën që edhe Presidenti i shtetit të jetë shqiptar”, tha Arbër Ademi, BDI.              

Biljana Vankovska, kandidatura e së cilës mbështet nga “Levica”, që në fillim u ankua se po përballet me probleme gjatë mbledhjes së nënshkrimeve, gjegjësisht për qasshmërinë  deri te Njësitë rajonale të KShZ-së. Paralajmëroi se do të dorëzojnë edhe ankesë deri te KShZ.  

“Ne jemi të gatshëm të përballemi me një milion probleme dhe për këtë qëllim dhe si sfidë në një situatë të tillë presim që qytetarët të tregojnë një frymë politike aventureske, të sigurojnë më shumë kandidatë për debatin real, të na japin mundësi të barabarta për ta prezantuar vetveten me programet tona. Jemi duke luajtur në një garë e cila nuk do të jetë e pastër dhe nuk është e pastër që nga dita e parë”, deklaroi Biljana Vankovska, kandidate për presidente.

Vërejtje për qasshmërinë deri te njësitë rajonale të KSHZ-së ku mblidhen nënshkrimet, ka edhe Maksim Dimitrievski, kandidat për president i Lëvizjes ZNAM.

“Mendoj se KSHZ nuk ka bërë mjaftueshëm për informimin e opinionit dhe qytetarëve se ku dhe në cilat vende dhe lokacione mund ta japin nënshkrimin e tyre për përkrahjen e kandidatin e preferuar. Kemi një numër të vogël zyrash dhe jo të gjitha komunat janë përfshirë me zyrat amë të KShZ-së”, theksoi Maksim Dimitrievski, kandidat për president.

Në këtë garë për president të shtetit hyn edhe aktivistja e njohur, Mersiha Smailoviq e Lëvizjes Demokrate të Boshnjakëve të cilët për herë të parë dalin me kandidat për president. Smailoviq pret që të mblidhen nënshkrimet e duhura për kandidaturën e saj.

“Më vjen mirë që një numër i madh qytetarësh ndjejnë nevojë që ta shprehin përkrahjen e tyre, më vjen mirë që e njohën momentin që me kandidaturën time duam të bashkojmë shumë njerëz të cilët tashmë nuk janë kaq shumë në momentin politik dhe shpresoj se sfidën e parë për mbledhjen e 10 mijë nënshkrimeve do ta kalojmë me sukses ndërsa për këtë na duhet përkrahja e qytetarëve”, u shpreh Mersiha Smailloviq, kandidate për presidente.

Në promovimin e djeshëm të Gordana Siljanovskës si kandidate nga VMRO-DPMNE, ajo tha se për të tashmë janë grumbulluar 30 nënshkrimet e duhura nga deputetët, por paralajmëroi se megjithatë do të grumbullojë nënshkrime nga qytetarët.

“Të them se kam për qëllim që të mbledh edhe 10 mijë nënshkrime, sepse mendoj se duhet të jem e barabartë me të tjerët  dhe kuptohet e kërkoj votën e atyre që nuk janë në politikë ose nuk kanë përcaktime ideologjike dhe partiake”, deklaroi Gordana Siljanovska Davkova, kandidate për presidente.

Përveç këtyre kandidatëve, obligim për mbledhjen e nënshkrimeve kanë edhe kandidati nga ASH, Arben Taravari, infektologu Vello Markovski dhe kryetari i partisë GROM, Stevço Jakimovski. Presidenti aktual Stevo Pendarovski nuk ka për obligim që të mbledhë nënshkrime për shkak se ai, njëjtë si Siljanovska, ka 30 deputetë dhe deri më tani nuk është shprehur nëse do ta kërkojë përkrahjen e 10 mijë qytetarëve si kandidatët e tjerë.