Festë në Konjare, ndalen punimet në lumin Pçinja derisa të bëhen inspektimet

Bllokuan rrugën e fshatit me makina.
Këtë herë nuk po protestojnë, por po festojnë.

Festojnë ndalimin e përkohshëm të punimeve të koncesionerit që bën eksploatimin e tokës në fshatin Konjare – Komuna e Petrovecit.
i pari që tregoi për ndalimin e punimeve ishte ministri i Bujqësisë, Arjanit Hoxha.

“Në seancën e sotme të Qeverisë, sollëm një vendim shumë të rëndësishëm për të ndërprerë përkohësisht punën e koncesionerit që bën eksploatimin e tokës në fshatin Konjare – Komuna e Petrovecit. Me këtë vendim do të ndërpriten punimet, deri sa të merren raportet e të gjithë institucioneve relevante”, njoftoi Hoxha.

Zëdhënësi i Qeverisë Muhamed Hoxha sot tha se ndërprerja e punimeve të firmës në Konjare do të zgjasë deri sa të bëhet inspektimi nga Inspektorati Shtetëror i Ambientit Jetësor.

“Republika e Maqedonisë së Veriut në seancën e mbajtur dje miratoi një vendim për ndërprerjen e punimeve të përkohshme të eksploatimit të zhavorrit apo rërës në Lumin Pçinja në zonën e fshatit Konjare e Mesme.
Kjo ndërprerje e koncesionit do të vlejë deri sa të zgjasë inspektimi i Inspektoratit Shtetëror të Ambientit Jetësor për shkak të indikacioneve të popullatës që grryerja po bëhet jashtë koncesionit”, deklaroi Hoxha.

Ndryshe ministri i Ekonomisë Kreshnik Bekteshi mbrëmë në Click Plus tha se po pret raportin e Inspektorit të Ambientit Jetësor dhe të Bujqësisë, për të parë nëse ka shkelje dhe parregullsi dhe nëse konstatohet një gjë e tillë, tha se kontrata do të shfuqizohet menjëherë.

Ndërsa para disa ditëve dhjetëra banorë që protestuan u thirrën në stacionin policor për shkak se bllokuan autostradën pa paralajmërim.