Fëmijët që qëndrojnë gjatë në Klinikën e Fëmijëve, nga shtatori do të mund t’i ndjekin mësimet online

Fëmijët e sëmurë të cilët do të trajtohen në spital ose në shtëpi më shumë se 3 javë, do të mund të ndjekin mësimin online, të organizojnë mësime individuale ose, përmes komunikimit asinkron, të marrin materiale dhe të zgjidhin detyrat e shtëpisë. Kështu njoftoi ministrja e arsimit Vesna Janevska.

“Fëmijët e sëmurë me kancer, nuk mundet dhe nuk duhet të izolohen nga shoqëria, nuk mund të kenë ndërprerje për nevojat e tyre të përditshme, dhe nuk mund të mbeten të harruar. Ne si shoqëri jemi të detyruar t’u ndihmojmë ta kalojnë këtë sfidë që po luftojnë çdo ditë”, tha Vesna Janevska, ministre e Arsimit dhe Shkencës.

Ministri i Shëndetësisë Azir Aliu shtoi se kanë rënë dakord bashkë me Janevskën që për realizimin e kësaj nisme, të punësohen edhe psikologë e pedagogë.

“Ne si ministri e shëndetësisë kemi krijuar infrastrukturë, në aspekt teknologjik dhe infrastrukturor që ta ndjekin mësimin në distancë. Nga sot bashkë me ministren dhe drejtorin kemi rënë dakord që përveç infrastrukturës dhe materialeve multimediale ne të bëjmë edhe një qasje të re që të punësojmë edhe pedagog dhe psikolog”, u shpreh Azir Aliu, Ministër i Shëndetësisë.

Drejtori i Klinikës Rexhep Memedi tha se përfshirja e fëmijëve nga spitali në arsimin formal, bën që ta kalojnë më lehtë trajtimin afatgjatë. Marija Vuk, kryetare e shoqatës për fëmijët me kancer “Sano” këtë e konsideroi si një shumë hap të rëndësishëm. 

“Për herë të parë po aplikohet arsimi formal për fëmijët që janë me qëndrim të gjatë në spital, ose po trajtohen në shtëpi për shkak të gjendjeve të rënda shëndetësore siç janë sëmundjet malinje dhe të tjera”, deklaroi Rexhep Memedi, drejtor i Klinikës së Fëmijëve. 

“Patjetër duhet ta pranoj që 10 vitet tona nuk janë aq të rënda, së paku një ditë e fëmijëve në spital. Shpresoj dhe jam e bindur dhe besojmë që me këtë projekt, me futjen e arsimit formal, fëmijët do të kenë mundësi më shpejtë, më lehtë, të shërohen dhe të kthehen pas në mesin e shokëve”, tha Marija Vuk, Kryetare e Shoqatës për Fëmijët me Kancer “Sano”.  

Aktualisht në klinikën për fëmijë ka rreth 20 fëmijë, por ky numër ndryshon herë pas here. Zakonisht, tek fëmijët me sëmundje malinje, trajtimi ndonjëherë zgjat deri në dy vjet, varësisht nga vetë patologjia.