Faton Faziu kritika për Irena Stefoskën: Aspak nuk na befasoi

TË FUNDIT

Sivjet, shqiptarët nga Ministria e Kulturës do t’i marrin një milion e pesëqind e tetëdhjetë mijë euro nga gjithsej tetë milionë e shtatëqind e shtatëdhjetë mijë euro, dhe nëse këtë e përkthejmë në përqindje, atëherë mund të konstatojmë se janë ndarë 18 për qind për kulturën shqiptare, theksoi në konferencën e sotme për shtyp, Faton Fazliu nga koalicioni Aleanca për Shqiptarët dhe Alternativa lidhur me publikimin e rezultateve të Programit vjetor kombëtar të Ministrisë së Kulturës.

Fazliu potencoi se koalicioni Aleanca për Shqiptarët dhe AlternAtivA nuk është aspak i befasuar me rezultatet skandaloze të shpallura, që, siç tha, edhe një herë e konfirmojnë qëndrimin tonë se kjo qeveri, si në çdo sferë tjetër, edhe në kulturë e vazhdon paradigmën e diskriminimit ndaj shqiptarëve.

 “Sa i përket veprimtarisë së bibliotekës nga gjithsej 8 projekte të personave juridikë ose fizikë, vetëm 2 janë shqiptarë. Shprehur me shuma, bibliotekave të rajoneve shqiptare do u jepen vetëm 4.650 euro nga gjithsej 10.097 euro. Ndërsa sa u përket institucioneve nacionale, nga gjithsej 111 projekte, vetëm 7 janë shqiptare, me vlerë 11.382 euro, kjo nga gjithsej 204.230 euro. Sa i përket veprimtarisë së Dramës, ku i përfshijmë institucionet nacionale, personat fizikë dhe ata juridikë, mund të shihet qartë dallimi i madh i financimit të projekteve shqiptare kundrejt atyre maqedonase. Këtu vlen të theksohet se nuk është mbështetur festivali “Akt Fest” dhe Stand Up Komedia, që në dy vitet e kaluara ishin freski e vërtetë në Shkup për dashamirët e dramës dhe komedisë. Nëse flasim me numra, kjo i bie që nga 1.408.413 euro, vetëm 404.848 euro janë ndarë për shqiptarë dhe 77.811 euro për bashkësitë e tjera etnike në vend. Në veprimtarinë e Arteve vizuale, dizajn dhe arkitekturë, nga gjithsej 325 projekte, në vetëm 66 projekte bartës janë shqiptarët. Ose, shprehur me shuma, nga 527.596 euro vetëm 86.179 euro janë dhënë për shqiptarët. Në veprimtarinë e Mbrojtjes së Trashëgimisë Kulturore dhe të mirave audiovizuale, nga gjithsej 1.193.579 euro më pak se 65.000 euro janë paraparë për projekte, gërmime dhe mbrojtje të trashëgimisë në rajone shqiptare”, tha Fazliu.

Ne, tha ai, për kulturën shqiptare i kemi miratuar 45 për qind nga shuma e përgjithshme, që me ankesa shkoi deri në 50 për qind.

“Dhe, nëse dikush nuk e ka të qartë akoma se pse kjo përbërje e Ministrisë së Kulturës i është sulur ish-ministrit të Kulturës Hysni Ismailit, është pikërisht ky sukses që i dëshpëron keq ata dhe shpresa e tyre e dështuar se ashtu do të na bëjnë presion ta ndihmojmë këtë shumicë tashmë të perënduar. Neve na vjen keq që suksesin tonë duan ta mbulojnë me shpifje, ndërsa ata e patën rastin ta dëshmojnë veten dhe sot i keni rezultatet publike që ta shohim të gjithë se dy parti shqipfolëse aty nuk arrijnë ta prodhojnë as gjysmën e asaj që e kemi bërë ne” theksoi Fazliu.

TË NGJAJSHME