Po qëndrojnë në derë, e nuk e dinë se çfarë do të ndodh me fatin e tyre.
Kjo është familja Ajetovski nga Tetova, e cila ka 8 vjet që jeton në strehimoren Çiçino në Shkup.
Por dje kanë marrë një lajm të keq. Drejtori i Qendrës sociale në Tetovë Darko Obadiç u tha se duhet ta lëshojnë strehimoren, pa ua treguar arsyen.
Kryefamiljari ka mbetur i shokuar dhe pa zgjidhje.
Tahir Ajetovski: “Le të më gjejnë një barakë, le të jetë edhe me teneqe, edhe me llamarina le të jetë, vetëm ta di ku t’i dërgoj unë fëmijët. Unë i kamë katër fëmijë unë edhe gruaja jemi 6 persona tani është dimër ku të shkojë”.
TV21: A iu tregoj arsyen drejtori?
Tahir Ajetovski: “Jo Jo”.
Gruaja e Tahirit thotë se nuk marrin as ndihmë sociale. Kanë fëmijë të vegjël, ndërsa nusja është shtatzënë, e nëse i nxjerrin nga kjo strehimore do të mbesin rrugëve.
Luljeta Ajetovska: “Ku të shkoj unë, burri nuk punon, ndihmë sociale nuk marr, asgjë nuk varem nga asgjë”.
TV21: Edhe ju nuk e dini arsyen pse po ju largojnë?
Luljeta Ajetovska: “Jo jo…”
TV21: Dokumentet i keni të gjitha në rregull?
Luljeta Ajetovska: “Krejt dokumentet i kamë me certifikatë të lindjes me librezë nuk e di çka është puna me drejtorin çka po na nxjerr neve pa arsye”.
Televizioni 21 kontaktoi me drejtorin e Qendrës sociale në Tetovë, Darko Obadiç. Ai tha se familja i ka kaluar të gjitha afatet për qëndrimin në strehimoren Çiçino, ndërsa duhet të kërkojnë që jetën ta vazhdojnë jashtë strehimores.
“Gjithashtu jemi në kontakt me disa organizata joqeveritare nga Shkupi dhe nga Tetova ku kanë dhënë pëlqim që do të ndihmojnë me pagesën e qirasë për një kohë që nënkupton disa muaj, me qëllim që familja të integrohet në shoqëri dhe të mund të lajmërohen në tregun e punës”, deklaroi Darko Obadiq – Drejtor i Qendrës Sociale – Tetovë.
Drejtori Obadiç tha se familjes do t’i sigurohet edhe ndihma sociale për fëmijët si dhe pensioni për kryefamiljarin. Ndryshe sipas informacioneve, në strehimoren Çiçino, familja Ajetovski nuk është vetmja që ka kaluar afatet e qëndrimit, pasi ka familje që aty qëndrojnë 15 vite.