Është i pasigurt fati i rekomandimeve të BE-së/ Pushteti nuk heq dorë nga shpërbërja e Këshillit, Gir është kundër

A do të dështojnë rekomandimet për reformat në Këshillin gjyqësor që i përpiluan ekspertët që i dërgoi BE? Nga VMRO-DPMNE në pyetjen e gazetarëve thonë se të gjitha propozimet janë të mirëseardhura.

“Çdo propozim por edhe ide që do të thotë ndryshim, është i mirëseardhur, por njëkohësisht kjo nuk do të thotë se heqim dorë nga angazhimi ynë që punët të ndryshohen dhe të përmirësohen”, tha Bojan Stojanovski, VMRO-DPMNE.

Partia në pushtet nuk tërhiqet nga qëndrimi për shpërbërjen e plotë të Këshillit, sepse në atë mënyrë, siç thonë, nuk do të ketë më prokurorë apo gjykatës që u shërbejnë elitave kriminale të biznesit.

“Shpërbërja e Këshillit është masë për të cilën nuk heqim dorë, në fakt ky ishte premtimi ynë para qytetarëve, që e mori përkrahjen e tyre. Ndërkohë, duhet pasur parasysh se rezistenca ndaj hapit të tillë është më e madhe prej atyre të cilëve u shkon në favor sistemi i kalbur i gjykatësve dhe prokurorëve”, tha Stojanovski.

Nga ana tjetër, euroambasadori Dejvid Gir me thirrje që të mos bëhet ky hap.

“Disa gjëra tashmë janë arritur, nuk nisim nga zeroja. Dhe nuk mendoj se duhet të jemi në pozitë ku duhet ta fshijmë sipërfaqen dhe t’ia nisim nga fillimi”, deklaroi euroambasadori Dejvid Gir.

Gir në një intervistë televizive theksoi se baza e shpërbërjes së Këshillit janë rekomandimet e ekspertëve europianë, por se nuk duhet bërë shpërbërje e plotë e Këshillit.

“Ne dërguam ekip ekspertësh, Mision vlerësues, që do të thotë se gjykatës të tjerë nga vendet anëtare të BE-së përpiluan një Raport me 40 rekomandime që duhet të zbatohen. Andaj po themi, ndërtoni në bazë të këtyre rekomandimeve derisa i zbatoni reformat”, u shpreh Gir.

Sipas opozitës, pushteti nuk duhet të presë me realizimin e rekomandimeve.

 “Reformat në gjyqësor janë të mundshme vetëm me zbatimin e 40 rekomandimeve të Misionit vlerësues të BE-së, me përkrahje dhe mbikëqyrje të bashkësisë ndërkombëtare”, thotë LSDM.

Një kohë më parë në brifing me gazetarët, ministri i drejtësisë Igor Fillkov, nuk u përgjigj se si është plani i Ministrisë për rekomandimet e Misionit vlerësues. Vetëm tha se për çështjen e Këshillit gjyqësor do të thërrasë debat më të gjerë.