“M*t e keni ba, tash doni me la! M*t e keni ba!”
Këtë përgjigje mori TV21 nga Ajdin Ramadani, drejtori i shkollës fillore “Adem Jashari”, pas kronikës për barin e pakositur në oborr të shkollës.
Në fakt, një ditë pas kronikës së TV21, punëtorët e NP “Parqe dhe Gjelbërime” shkuan dhe e kositën barin.
“Ora është 8 e mëngjesit ndërsa punëtorët e Ndërmarrjes Publike Parqe dhe Gjelbërime kanë dal në terren për ta kositur barin në oborrin e shkollës fillore Adem Jashari”, raportoi gazetarja Arbana Q. Klimenta nga terreni.
Sipas rregullores shkollat duhet vetë ta mirëmbajnë oborrin, pasi që kanë të ndarë buxhet të posaçëm për këtë gjë.
Për këtë deshëm të pyesim drejtorin e shkollës Ajdin Ramadani të cilin e takuam në oborrin e shkollës, por ai fillimisht iku nga kamera.
Tentuam edhe njëherë në hyrje të shkollës, por ai u drejtua me fjalë të pahijshme.
“Mt e keni ba, tash doni me la! Mt e keni ba!”.
Kjo shkollë bie në kompetencat e komunës së Çairit. Edhe kryetari i kësaj komune Visar Ganiu thotë se Nuk është detyrim i Parqeve dhe Gjelbërimeve për t’i pastruar oborret e shkollave, ndërsa në pyetjen se a do të shkarkohet drejtori i shkollës për sjelljen e tij të pahijshme u përgjigj.
“Kuptohet që çdo sjellje e pahijshme do të sanksionohet. Por çdoherë kur i marrë hapat veproj me sektorin e arsimit dhe janë në korrelacion të ngushtë me Ministrinë e Arsimit dhe sigurisht pas vërtetimit të informacionit do të marrë masa”, deklaroi Ganiu.
E çfarë thotë ministrja për sjelljen e tillë të drejtorit?
“Nuk e kam të njohur rastin, nuk i di detajet për të komentuar. Por të gjithë drejtorët duhet në mënyrë të përkushtuar ta bëjnë punën me kujdes. Poashtu duhet të jenë shembull për nxënësit dhe të sillen mirë me nxënësit”, deklaroi Carovska.
Komuna sot do të mbledh sektorin e Arsimit të komunën e Çairit dhe do të vendos se çfarë sanksione do të merr drejtori i shkollës Adem Jashari, Ajdin Ramadani. Ndryshe një ditë më parë TV21 raportoi për gjendjen e mjerueshme të oborrit të shkollës. Vetë prindërit ishin të shqetësuar për sigurinë e fëmijëve të tyre pasi që ka edhe kabllo të hapura elektrike.