Pesë muaj na ndajnë nga zgjedhjet lokale, e partitë politike ende nuk kanë arritur në një konsensus për ndryshim të Kodit Zgjedhor. Grupi i punës i përbërë nga përfaqësues të partive, u takua sërish dje në Klubin e Deputetëve, por dallimet mbeten. Për ndryshimet për zgjedhjet lokale kanë një farë qëndrimi të përafërt, për lista të hapura për këshilltarët, por për zgjedhjet parlamentare dhe numrin e njësive zgjedhore, dallimet mbeten të mëdha.
Pika e parë për të cilën janë duke folur në takim, si çështje më urgjente, janë ndryshimet për modelin e zgjedhjeve lokale. Edhe pse bëhet fjalë për një ligj, Jovan Mitrevski nga LSDM, thotë për TV21 se për modelin e zgjedhjeve lokale dhe atyre parlamentare, flitet si për dy çështje të ndryshme. Socialdemokratët janë për lista të hapura në zgjedhje lokale.
“Të shohim se si do të zhvillohej i njëjti, nëse mundet në këtë mënyrë të përcillet edhe në nivelin qendror, respektivisht në zgjedhje parlamentare. Bëhet fjalë për shumë çështje, jo vetëm për atë “lista të hapura” por çfarë d.m.th ajo lista të hapura dhe si do të vazhdohej më tej i gjithë procesi. Lehtë është të thuhet “të hapura” por si do të bëhej në praktikë, në terren, kjo është çështje që debatohen”, tha Mitrevski.
Sa u përket zgjedhjeve parlamentare, LSDM është për një njësi zgjedhore, megjithatë Mitrevski thotë se për këtë ndryshim duhet të ketë konsensus mes të gjitha partive. Partneri i tyre i koalicionit është kundër një njësie zgjedhore për parlamentaret. Arbër Ademi nga kjo parti thotë se ndryshimet e kodit zgjedhor imponojnë konsensus etnik dhe politik. Sa u përket ndryshimeve për zgjedhjet lokale edhe BDI në parim është pro listave të hapura.
“Po ne parimisht kemi thënë se ne jemi për lista të hapura për këshilltarët komunal por nuk jemi për zgjedhjet e kryetarit të komunës me 1 raund, vetëm një raund zgjedhor. Tash ka argumente pro dhe kons këtij qëndrimi dhe respektivisht propozimeve të partive të tjera të cilët për hir të korrektësisë nuk dua të shpalos për momentin për arsye se dëshirojmë t’i japim shans, t’i japim mundësi dialogut ndërpartiak”, tha Ademi për TV21.
Përfaqësuesi i VMRO-DPMNE-së në takime, Igor Janushevski, nuk deshi të flasë para kamerës, shkurt në një përgjigje me shkrim konsideron se është herët për të folur për detaje, ndërsa mbeten në qëndrimin se ndryshimet eventuale të kodit zgjedhor mund të bëhen vetëm me konsensus mes të gjithë faktorëve politikë. Jozyrtarisht TV21 mëson se kërkesa e VMRO-DPMNE-së për zgjedhjet lokale është që kryetari i komunës të zgjidhet në rrethin e parë, nëse ka mbi 25% të votave.
Nga ana tjetër, Syrja Rashidi nga Aleanca për Shqiptarët, tregon se janë për lista të hapura për këshilltarë komunal, por zgjedhja e kryetarit të mos ndryshohet.
“Nga ana tjetër sa i përket zgjedhjet së kryetarëve të komunave, jemi për zgjidhjen aktuale, pra për dy raunde të zgjidhet kryetari i komunës për arsye të ruajtjes së një niveli më të lartë të përgjegjësisë dhe legjitimitetit të kryetarit. Shumica e subjekteve janë për dy raunde zgjedhore, janë edhe për lista të hapura dhe ky do të ishte një lloj kompromisi që besoj se do të mund të arrihej sepse sa i përket zgjedhjeve lokale dallimet janë pak më të vogla se sa në zgjedhjet parlamentare, dhe shpresoj që në debatin e ardhshëm javën e ardhshme të kemi një marrëveshje finale, në rast se nuk do të ketë, do të shkohet ashtu siç ka qenë deri më tani”, u shpreh Rashidi.
Nga Ministria e Drejtësisë, nën patronazhin e së cilës mbahen takimet e partive, nuk japin detaje për debatin. Vetëm thonë se takimi ka kaluar në atmosferë konstruktive. Aty marrin pjesë LSDM, VMRO-DPMNE, BDI, Aleanca për Shqiptarët, Besa, E Majta, VMRO-Popullore, PLD, Lidhja Demokratike dhe partitë parlamente të etnive më të vogla. Të ftuar kanë qenë edhe RDM-ja dhe Alternativa. Aty ka qenë edhe Ministri i Brendshëm, Oliver Spasovski./TV21