Ende nuk janë shpallur të gjithë kandidatët, LSDM dhe VMRO-DPMNE kërkojnë edhe pak kohë!

Kandidatët e partive të tjera që do t’i pëlqejnë LSDM-së, do të marrin mbështetje që në rrethin e parë të zgjedhjeve lokale, ndërsa socialdemokratët nuk do të nominojnë askënd, paralajmëron kreu i partisë, Zoran Zaev, duke pritur që të njëjtën gjë ta bëjnë edhe partnerët e koalicionit.

 “Një pjesë e kandidatëve që neve na pëlqejnë, do t’i mbështesim që në rrethin e parë dhe jo vetëm kaq, por as nuk do të nominojmë kandidatë. Kështu presim edhe nga partnerët, që japin mbështetje për kandidatët tanë, LSDM-së ose partive të tjera, që t’i mbështesin partitë e bllokut shqiptar BDI, Besa, PDSH që në rrethin e parë. Atje ku definitvisht të gjithë do të kemi kandidatë, qytetarët do të na thonë kush ku do të fitojë shans për rrethin e dytë ,e  atëherë do të mbështesim në rrethin e dytë, me shumë gjasa përballë kandidatëve opozitarë”, tha kryetari i LSDM-së, Zoran Zaev. 

Deri më tani LSDM ka shpallur kandidatët për 35 komuna, ndërsa gjysma e emrave të tjerë ende nuk dihen, por do të merren vesh shpejt, sepse po afrohen edhe afatet për dorëzim të emrave në KSHZ.

 “Afati është diku javën e ardhshme, 23 deri kah data 25 duhet të përfundojmë sepse duhet të lëmë disa ditë për mbledhjen e dokumenteve të domosdoshme, deklarata e noterizuar, vërtetim se nuk është i gjykuar  dhe të tjera”, shtoi Zaev.

Nga kandidatët tashmë të publikuar të LSDM-së, shumica janë kryetarë aktualë nëpër komuna. Për dallim prej tyre, opozitarja VMRO-DPMNE premton 90% fytyra të reja, por kërkojnë durim pasi që organet e partisë ende janë duke i bërë filtrimet e fundit, ndërsa emrat do të shpallen së shpejti.

 “Në lidhje me personat, po do të publikohen pjesë e madhe e kandidatëve, kështu kemi paralajmëruar, do të jenë 90%  figura të reja në rrethet e tyre, do të jenë njerëz që nuk kanë aspirate kriminale siç janë kandidatët e LSDM-së, por do të jenë njerëz që kanë integritet dhe autoritet në vendet ku jetojnë dhe do ta sjellin fitoren e madhe të VMRO-DPMNE-së dhe koalicionit në këto zgjedhje lokale”, potencoi Dimçe Arsovski nga VMRO-DPMNE.

Edhe tek partitë shqiptare mbeten të kuptohen edhe shumë emra kandidatësh, sepse nuk janë shpallur për të gjitha komunat. Ende nuk ka diçka konkrete në lidhje me koalicionimin ose mbështetjen mes partive opozitare, VMRO-PDMNE dhe koalicionit Aleanca për Shqiptarët-Alternativa. Asnjëra palë nuk ka mohuar bashkëpunimin e mundshëm, por hap konkret ose ndonjë takim deri më tani nuk ka ndodhur. Për dallim prej tyre, partnerët aktualë qeverisës LSDM, BDI, Besa dhe PDSH tashmë janë marrë vesh për koalicion.