Edhe të pa vaksinuarit do të mund të votojnë, Filipçe: Në zgjedhjet paraprake nuk kishte bartje të virusit

Nëse nuk jeni të vaksinuar dhe kishit dilemë nëse do të mund të votoni në zgjedhjet lokale, keni “dritë jeshile” nga ministri, Komisioni për sëmundje ngjitëse, ndërsa të njëjtën gjë e konfirmuan edhe nga KSHZ, kuptohet me respektimin e protokolleve tjera. Certifikata për pranimin e dy dozave të vaksinës kundër Kovid-19 nuk ju nevojitet.

 “Certifikatat për vaksinim nuk janë parakusht për hyrje në vendvotime. Atë që të gjithë qytetarët do të duhet të respektojnë si protokoll për mbrojtje janë mbajtja e maskave mbrojtëse, si dhe dezinfektimi i duarve gjatë hyrjes në vendvotim”, tha Lupka Guguçevska Filiposka – zëdhënëse e KSHZ-së.

Për respektimin e masave do të kujdesen këshillat zgjedhorë, përkatësisht njëri prej tyre që do të jetë më afër vendvotimit. Protokollet duhet të respektohen edhe nga ana e tyre si mbikëqyrës.

 “Në përputhje me udhëzimin që është në proces të miratimit nga KSHZ, nuk do të lejohet hyrje e personave që nuk mbajnë maska, kështu që në këtë mënyrë do të sigurohet ndonjë siguri në raport me respektimin e protokolleve të sigurimit”, shtoi zëdhënësja e KSHZ-së, Lupka Guguçevska Filiposka.

Këtë e konfirmoi edhe Komisioni për sëmundje ngjitëse dhe Ministria e shëndetësisë.

 “Në lidhje me ditën e votimit, ka protokolle, përqindja më e madhe e atyre që janë të përfshirë në procesin e përgjithshëm, janë të vaksinuar. Por, edhe gjatë zgjedhjeve paraprake, atëherë nuk kishte vaksina por duke bërë kujdes për gjithë protokollet për zbatimin e ngjarjeve në të mbyllur, siç janë numri i të pranishmëve në një vend, mbajtja e distancës, pritja jashtë, nuk kishte asnjë rast të bartjes së virusit”, deklaroi ministri i Shëndetësisë, Venko Filipçe.

Në ndryshimet e fundit të Kodit zgjedhor nga 15 shtatori, Ministria e shëndetësisë është e obliguar që të sigurojë maska dhe pajisje mbrojtëse për anëtarët e organeve zgjedhore, si dhe mjete për dezinfektim për të gjithë vendvotimet.