Një ditë para skadimit të afatit shtesë, partitë nuk kanë treguar ndonjë mundësi që të afrojnë qëndrimet dhe të miratojnë Kodin e ri Zgjedhor, i cili është pjesë e Agjendës së Reformave. Megjithatë, ambasadori i BE-së në vend Mihalis Rokas nuk e humb shpresën dhe pret që partitë politike të arrijnë konsensus.
“Unë vërtet shpresoj, ka edhe një ditë për të arritur konsensus. E kuptoj që koordinatorët e partive takohen çdo ditë dhe shpresoj që ky hap të arrihet. Siç e dini dhe siç është bërë e ditur për opinionin, bëhet fjalë për 4.2 milionë euro, të cilat do të përdoren si përfitim për qytetarët e Maqedonisë, dhe shpresoj që ky konsensus të arrihet deri në fund të ditës së nesërme”, theksoi Mihalis Rokas – ambasador i BE-së në RMV.
Por, pavarësisht këtyre shpresave të euroambasadorit, partitë vazhdojnë të jenë në qëndrime diametralisht të kundërta. Kryetari i LSDM-së, Venko Filipçe, thotë se ata do ta pranojnë atë ligj me të cilin do të përmirësohet mënyra e votimit, por nuk pranojnë futjen e një mekanizmi me të cilin zgjedhjet do të mund të manipulohen.
“Si do të kontrollohet votimi elektronik ose dërgimi i votave me postë? Pushteti nuk propozon asnjë mekanizëm kontrolli përveç këtij propozimi. Kjo e konfirmon dyshimin se ata duan të fusin një mekanizëm për vjedhjen e zgjedhjeve. Asgjë tjetër. Nëse duan, mund të hapim debat në kuadër të një grupi ekspertësh për të gjetur një zgjidhje të përshtatshme. Ky është qasja e vërtetë”, tha Venko Filipçe, kryetar i LSDM.
Nga VMRO-DPMNE, fajin ia hedhin opozitës, duke thënë se ajo nuk ka qëllim të arrijë marrëveshje për Kodin e ri Zgjedhor.
“Lidhja Socialdemokrate, Levica dhe BDI-ja nuk duan Kod të ri Zgjedhor, sepse këtë e përgatisin si alibi para ciklit të ardhshëm zgjedhor. Kjo përafërsisht do të dukej kështu: të parët do të ankohen se nuk janë përfshirë rekomandimet e OSBE-së dhe ODIHR-it në Kodin e ri Zgjedhor, të tjerët do të ankohen se nuk kanë më shumë para për reklamim, ndërsa të tretët do të ankohen se nuk është respektuar vullneti i qytetarëve”, deklaroi Valentin Manasievski – Zëdhënës I VMRO-DPMNE-së.
Qëndrimi i partive shqiptare është se diaspora duhet të ketë të drejtë vote. Lidhja Shqiptare ka paralajmëruar se do ta bllokojë ligjin nëse nuk arrihet marrëveshje që diaspora të votojë.