Në shkollën fillore “Vlladimir Polezhinoski” në Kërçovë është vendosur që nxënësit të mbajnë uniformë, por shumë prindër janë kundër. Kjo për shkak se u është thënë që vetë duhet t’i paguajnë uniformat, gjë që është e vështirë për disa familje që kanë 2 a 3 fëmijë në shkollë, aq më tepër tani në kohë krize ekonomike dhe kur fëmijët nuk janë të pajisur as me të gjithë librat e nevojshëm.
“I detyrojnë fëmijët që të sigurojnë uniforma, puna është pak edhe qesharake, tragjedi-komike sepse sigurimi i uniformave dhe pagesa nuk është e qartë, veçanërisht se duhet të paguhet në dy këste por të dy këstet duhet të paguhen në të njëjtin muaj, njëra më 10.11 dhe tjetra diku ka 20-ti. Kjo është tallje me kapacitetin e prindërve tallje me fëmijët, bëhet fjalë për presione të transmetuara se ai është vendim i domosdoshëm. Njëri fëmijë ka vetëm një pjesë të librave për një pjesë të lëndëve mësimore, ndërsa për pjesën tjetër aspak nuk ka. Tjetri më i vogli ka skripte, në vend të librit”
TV21 kërkoi qëndrim nga drejtori i shkollës Goran Karafiloski, por na tha se kjo nuk ka të bëjë me udhëheqësinë e shkollës, sepse siç shtoi, vendimet e këtilla i sjellë këshilli i prindërve. E nga ky këshill thonë se në vitin shkollor 2018/19 kanë marrë vendim që fëmijët të mbajnë uniforma.
“Sipas atij vendimi, këshilli vendosi blerjen e uniformave të reja shkollore për nxënësit. Në mbledhjet e përbashkëta dhe individuale të prindërve, shumica e prindërve ishin pro blerjes së uniformave për nxënësit, si dhe u vendos që pagesa e uniformave të bëhet me dy këste, kësti i parë deri më 10.11.2022 dhe kësti i dytë deri më 30.11.2022, por këshilli u mblodh sërish dhe vendosi shtyrjen e këstit të dytë deri më 15.12.2022”, tha Goran Poposki, kryetar i Këshillit të Prindërve.
Kryetari i Këshillit shton po ashtu se e kanë parasysh edhe aspektin social dhe material të familjeve , andaj kanë vendosur ata që nuk janë në gjendje të mirë financiare, të mos paguajnë.
Përndryshe, në shkollat publike të Maqedonisë nuk është e detyrueshme mbajtja e uniformës.