“Duam ajër të pastër”/ Karshiaka proteston, kërkon heqjen e deponisë Drislla

Duam ajër të pastër. Banorët e Karshiakës sërish protestuan për ajrin e ndotur dhe erën e keqe që e shkakton deponia Drislla që gjendet afër vendbanimeve të tyre. Ata kërkojnë që autoritet të marrin masa sa më shpejt, dhe këtë deponi ta shndërrojnë në deponi me standarde europiane sepse siç thonë ata në këtë deponi digjen mbeturina dhe gjësende tjera shumë të dëmshme për shëndetin e njerëzve.

 “Një prej shkaqeve të emigrimit është, çdo herë thonë pse të rijmë këtu kur s’kemi ajër të pastër, kemi viruse, kemi gripëra. Do të thotë që shiko kjo deponi është shkaktare që njerëzit të emigrojnë prej këtij vendi.”- tha Jasir Islami, arsimtar.

“Ju bëjmë thirrje institucioneve përgjegjëse, ju bëjmë thirrje kryetares së Qytetit të Shkupit, Danella Arsovska, drejtorit të deponisë, Kryetarit të Komunës së Studeniçanit dhe Sopishtes, të gjitha ambasadave. Le të dalin le ta shikojnë situatën në vend, sepse shumë lehtë është të flasësh nga zyrat e qytetit të Shkupit atje.”- tha Rasim Ademi, Hoxhë.

 “Lëre se mbeturinat, por më e keqja të gjitha operimet që bëhen nëpër spitalet e Maqedonisë hidhen këtu. Çfarë janë ato? Ato janë të gjitha sëmundjet që janë tek njeriu. E ai tymi ku shkon? Ai tym bie nëpër oboret tona nëpër pemët tona.”

 “Ato e kërkojnë shpërnguljen tonë nga këtu, me qëllim është bërë kjo deponi. Ka 25-ë vite që na gënjejnë që këtu do të bëhet fabrikë për riciklimin e mbeturinave dhe nuk do të jetë deponi. Sikur e shikoni sot jo që jemi në deponi po kjo është bërllogishte.”

 “Kjo erë e keqe e ky dëm i madh që po i bëhet popullit tonë ndjehet edhe në fshatin tonë në fshatin Studeniçan. Unë jam ish punëtor i ndërmarrjes publike komunale të Komunës së Studeniçanit, 10-të vite kam punuar në këtë ndërmarrje dhe 10-të vite me radhë kam parë se çfarë mbeturinash hidhen dhe çfarë padrejtësisht i bëhen këtij populli. Jo vetëm Batincës por gjithë Karshiakës.”

Organizatorët e protestave kërcënuan se nëse nuk do të ketë zgjidhje, në ditët në vijim ata do ta bllokojnë rrugën që çon deri tek deponia dhe do ta pamundësojnë lëvizjen e kamionëve të kësaj deponie.