Njësitë Antikontrabandë të Doganës së Kosovës kanë kapur sot një autobus që udhëtonte nga Shqipëria drejt Kosovës pa pasagjerë, duke zbuluar rreth 120 kilogramë kanabis. Autobusi u ndalua në Autostradën “Ibrahim Rugova” dhe më pas u shoqërua për kontroll të detajuar në objektet e Doganës në Prishtinë.
Kontrolli u realizua me përdorimin e qenve nuhatës të dhuruar nga organizata gjermane GIZ dhe pajisjeve profesionale të ofruara nga programet e Qeverisë së SHBA-së. Ky zbulim konsiderohet një sukses i rëndësishëm në përpjekjet e Doganës së Kosovës për të parandaluar trafikun e drogës dhe për të mbrojtur shoqërinë.
Rasti i është dorëzuar njësive Antidrogë të Policisë së Kosovës për procedura dhe veprime të mëtejshme penale. Doganat e Kosovës theksojnë se do të vazhdojnë të jenë të përkushtuara në luftën kundër kontrabandës dhe krimit të organizuar, duke rritur bashkëpunimin me partnerët vendorë dhe ndërkombëtarë për sigurinë dhe sundimin e ligjit.
Ky rast vjen pak javë pas një operacioni të ngjashëm, i realizuar në bashkëpunim me Policinë e Kosovës dhe Agjencinë e Kosovës për Inteligjencë.