“Do të të shkatërrojmë” – Historia e zhdukjes dhe gjetjes së aparatit për eko në Kërçovë

Gjatë ditës së djeshme SPB Kërçovë kumtoi se është ngritur padi penal kundër personit me iniciale S.T 49 vjeç nga Kërçova për dyshimin “përvetësim për shërbim”.

Ai dyshohet për “zhdukjen” e aparatit për eko nga Spitali i Kërçovës.

Drejtoresha e re e Spitalit Maja Cvetanovska-Trajkovska thotë në shtator deshi ta vërë në funksion këtë aparaturë që kishin 3 vite që e kishin marrë si donacion, por nuk e gjeti dot.

“Unë në shtator e kam vërejtur që aparati mungon. Pasi mora detyrën zyrtare doja që aparatin ta vendosë në funksion, e kërkuam gjithkund, por nuk e gjetëm. Më  21 tetor pasi nuk kisha shpresa për gjeten e tij e paraqita rastin në stacionin policor”, tha Maja Cvetanovska-Trajkovska

Pas kësaj kishte variante të ndryshme për vendndodhjen e aparatit.

Me të paraqitur rasti në polici, aparati u gjet natën mes 23 dhe 24 tetorit në garazhin e hapur të Spitalit. Ishte i mbuluar me qese dhe me mbishkrimin “Do të të shkatërrojmë” .

Prej asaj dite e deri dje rreth orës 14 aparati ka qenë në polici në sektorin për krim teknik. Dje pasdite e kanë vendosur në magazinë dhe së shpejti do ta instalojnë për ta vënë në përdorim.

Mes atyre drejt të cilit drejtohej gishti për zhdukjen e aparatit ishte edhe ish-drejtori i Spitalit të Kërçovës Stanko Trpeski. Ai për TV21 tha se është i tronditur nga këto lajme dhe përgënjeshtroi gjithçka që thuhet ndaj tij.

“Demantoj gjithçka për të cilën akuzohem. Në shtëpinë time nuk ka ardhur as policia. Unë kam angazhuar avokat për gjithë akuzat që më janë hedhur dhe gjithçka do te shkoj në rrugën gjyqësore për të vërtetuar se nuk ka qenë tek unë dhe nuk e kam marr unë. Aparati ka qenë në spital gjatë gjithë kohës”, tha Stanko Trpeski.

Aparati ka qenë donacion i Ministrisë për punë Sociale dhe kap vlerën rreth 2 milionë denarëve. Nuk u vendos në funksion për shkak se duhej të instalohej dhe personeli duhej të trajnohej për ta përdorur.