Dita e Flamurit shqiptar kremtohet edhe në Maqedoni – Shqiptarët anembanë vendit shënojnë Ditën e Pavarësisë

Dita e Flamurit shqiptar u kremtua edhe në Maqedoninë e Veriut. Shqiptarët në çdo qytet organizuan në mënyra të ndryshme manifestime për të rikujtuar 112 vjetorin e pavarësisë së Shqipërisë. Festa u shënua në Shkollën Fillore “Ismail Qemajli” në Shkup, si ditë e patronatit të shkollës. Nxënësit me veshje kombëtare performuan me këngë e valle para prindërve dhe arsimtarëve të tyre. Ndërkaq, drejtoresha e shkollës tha se shqiptarët këtë ditë e kremtojnë anembanë trojeve shqiptare.

Zëvendëskryeministri i parë Izet Mexhiti, tha se kjo festë duhet të bashkoj shqiptarët për t’ju mundësuar një mirëqenie më të mirë në qytetet e tyre si në arsim, kulturë, shëndetësi, ekonomi, politikë e të tjerë.

28 Nëntori u festua edhe në Kumanovë, Tetovë, Gostivar, Dibër, Manastir, Strugë e Kërçovë.

Te kjo e fundit organizimi i koncertit u bë nga mërgata shqiptare, për vendlindjen e tyre në Kërçovë.

Edhe kreu i Kuvendit Afrim Gashi, uroi festën e flamurit.

Ndërkaq, liderët të tjerë këtë ditë festojnë në mesin e diasporës. Kryetari i Lëvizjes Besa Bilall Kasami dhe me funksionarë të tjerë festojnë me shqiptarët e Danimarkës. Kurse, kryetari BDI-së Ali Ahmeti përcjellë porosinë nga Zvicra: “Ky përvjetor i 112-të i ditëve më të shenjta të kombit tonë shqiptar na përkujton që përpjekjet për liri, barazi, pavarësi, flamur, gjuhë janë të përditshme dhe angazhimet tona nuk duhet ti ndalim asnjëherë”. Festa qendrore do të zhvillohet në mbrëmje në Sheshin Skënderbeu në Shkup, me një koncert të organizuar nga Komuna e Çairit.