Deputetët në Kuvend sot e vazhduan debatin për Ligjin e regjistrimit, me ç’rast ato nga shumica qeveritare dhe opozita mbetën në qëndrimet që i paralajmëruan partitë e tyre amë. Deputetët e VMRO-DPMNE-së sërish nxorën qëndrime pse duhet të tërhiqet Ligji dhe të anulohet regjistrimi, ndërsa ato të LSDM-së dhe partive tjera qeveritare mbetën në pohimet se nuk do të ketë keqpërdorime dhe se regjistrim do të ketë.
Deputetja e VMRO-DPMNE-së, Gordana Siljanovska Davkova konsideron se Ligji për regjistrim të popullatës është me shumë mospërputhje dhe në të nuk janë futur rregulloret dhe standardet e Bashkimit Evropian dhe Eurostat, ndërsa njëkohësisht, sipas saj, bëhet edhe keqpërdorim i flamurit evropian nga ana e shumicës qeveritare. Titulli i Ligjit, konsideron Siljanovska Davkova, nuk përputhet me atë që do të nënshkruhet.
“Dëgjoj në televizion, jo gjatë debatit, nga drejtori se si flet në Alsat për popullatë rezidente dhe jorezidente, por e rilexova disa herë ligjin dhe nuk mund të shoh klasifikime të tilla. Me siguri do të jetë në metodologjinë, por edhe ajo nuk është dhe do ta marrim një muaj pas sjelljes së ligjit, kështu që unë ju referoj në përvoja tjera të shikoni se si përvojat metodologjike janë së bashku në pakon me ligjet, me sqarime serioze, me të gjitha instrumentet e tajmingut të afateve dhe ngjashëm”, tha Siljanovska Davkova.
Sipas saj, nevojitet arsyetim serioz për atë se si do të realizohet regjistrimi që të mos ketë mosbesim në proces.
Siljanovska Davkova vlerësoi se “sërish keqpërdoret flamuri evropian”, në ndonjë ligj, duke shtuar se në dy muajt e fundit pothuajse 20 ligje që ishin sjellur ishin me flamur evropian.
Deputetja Vjollca Ademi nga BDI-ja ka replikuar se metodologjia nuk është përfshirë në ligj, sepse është pjesë profesionale dhe me ligj nuk mund të rregullohet. Sa i përket regjistrimit të diasporës, Ademi theksoi se duke filluar nga fakti që diaspora jep mbështetje të përhershme politike dhe ekonomike në atdheun e tyre dhe duke e marrë parasysh kontributin e tyre, “nuk mund të zhvillojmë proces që nuk përputhet me realitetin.
Siljanovska Davkova replikoi se regjistrimi duhet ta konfirmojë pasqyrën reale. “Popullata, mendohet popullata rezidente. Pse? Që të planifikoni ekonomi, mbrojtje sociale, shëndetësi, arsim, politikë, duhet t’i dini nevojat e njerëzve dhe strukturën këtu”, tha deputetja e VMRO-DPMNE-së opozitare. Ne, shtoi ajo, duhet të kemi kontroll se sa qytetarë tanë jetojnë në diasporë, por flasim për statistika.
Lidija Tasevska nga LSDM-ja theksoi se Ligji për regjistrim të popullatës, amvisërive dhe banesave në vitin 2021 është ligj shumë i rëndësishëm dhe se me të dhënat e regjistrimit do të krijohen politika zhvillimore, planifikime makroekonomike, hulumtime shkencore dhe të tjera dhe operacione statistikore.
Sipas saj, Republika e Maqedonisë së Veriut ka mungesë të të dhënave cilësore statistikore, ndërsa me këtë ligj mundësohen kushte për operacion të pavarur statistikor. Ajo theksoi se regjistrimi do të bëhet me profesionalizëm të rreptë, ndërsa do të realizohet nga Enti Shtetëror për Statistikë.
Tasevska përgënjeshtron se do të nënshkruhet vetëm me dhënie të numrim të amzës, duke potencuar se do të bëhen krahasime me bazat e të dhënave të shumë institucioneve.
Debati kuvendor për Ligjin e regjistrimit të popullatës për vitin 2021 vazhdon pas pushimit të rregullt prej një ore.