Disa zjarre në Kërçovë / Banorët luftojnë flakët me degë pemësh

Pesë ditë radhazi po digjet mali mes fshatit Zajaz-Çelikaj dhe fshatit Drogomisht i Madh. Përveç zjarrfikësve të Kërçovës për shuarjen e zjarrit u aktivizuan edhe vetë banorët. Me çfarë kishin në duar mundoheshin t’i ndalin flakët që kishin marrë hov të madh drejt Drogomishtit dhe iu afruan shkollës dhe varrezave të fshatit.

Ky është Shpëtimi, i cili me një degë të këputur po mundohej të shuante zjarrin.

Mbi 80 qytetarë vullnetarisht kanë dalë për të shuar zjarrin me ditë të tëra, tha një banorë.

Zjarr aktiv edhe në fshatin Patec të Kërçovës, ku prej 10 gushtit me zjarrin luftojnë babë e bir dhe disa banorë nga qyteti që kanë shkuar për ndihmë.

Zjarr të madh kishte edhe në fshatin Kaleshe të Kërçovës i cili dy ditë më parë dogji edhe një shtëpi.

Në fshatin Pllasnicë zjarri vazhdon ende të jetë aktiv prej një jave e gjysmë, por është vënë në kontroll.

Nga Qendra për Menaxhim me Kriza kanë informuar se dje në hapësirë ​​të hapur ka pasur gjithsej 49 zjarre, nga të cilat 12 janë aktualisht aktive, shtatë janë nën kontroll dhe 30 janë shuar.

Tashmë 10 ditë po zgjat beteja me zjarrin në Parkun kombëtar të Galiçicës, ku rreth 140 ekipe, nga ajri dhe toka, janë terren në përpjekje për ta vënë nën kontroll.