Kontesti mes Maqedonisë së Veriut dhe Bullgarisë kërkon urtësi dhe gjakftohtësi, thotë kreu i BDI-së Ali Ahmeti, duke thënë se duhet qëndrohet krah për krah maqedonasve në zgjidhjen e problemit.
“Nuk mund të mos jemi në krah dhe në anë të bashkëqytetarëve tanë maqedonas”, tha Ali Ahmeti – kryetar i BDI-së.
Po krahas kësaj, Ahmeti thotë se pret që historianë dhe linguistë kontesteve të këtilla t’u japin kahje, me qëllim që kjo çështje të mos zgjasë sepse mund të rrisë emocionet dhe kontraditat.
Ndihmë kërkon edhe nga Bashkimi Evropian.
“Edhe me Bullgarinë na duhet një lehtësim nga komuniteti ndërkombëtar, në veçanti nga Bashkimi Evropian, sepse Bullgaria është vend anëtar”, u shpreh kryetari i BDI-së, Ali Ahmeti.
Ahmeti përmendi edhe se Sofjes zyrtare i është dërguar ofertë, por nuk zbuloi detaje, duke thënë se do të pritet ta shohim reagimin e Bullgarisë.
Kryeministri Zoran Zaev ndërkaq siguron se nuk bisedohet për heqje dorë të palës maqedonase nga ndonjë qëndrim.
“Nuk flasim për heqje dorë, flitet për zgjidhje. Ekzistojnë mënyra se si kjo të zgjidhet. Theksojmë se më vjen mirë që Bullgaria e njeh identitetin dhe gjuhën maqedonase si realiteti ynë, ndërsa besoj se nëpër ato formulime do të gjenden edhe zgjidhje sepse ato ekzistojnë”, potencoi Zoran Zaev – kryeministër i Maqedonisë së Veriut.
Si Kryeministri Zoran Zaev, po ashtu edhe Ahmeti, ditëve të fundit kanë dhënë sinjale se deri në fund të vitit do të ketë një marrëveshje mes Shkupit e Sofjes.
Zaev është i bindur se takimi me homologun e tij bullgar Bojko Borisov do të ndodh në Këshillin e dytë të Ministrave të BE-së që duhet të mbahet në dhjetor.