Dhimbje shpine? Ja çfarë duhet të bëni për ta lehtësuar apo parandaluar

Shkaqet e dhimbjes së shpinës mund të jenë të shumta dhe komplekse, por ka disa gjëra që mund të bëni për ta lehtësuar atë ose që të mos përkeqësohet.

Çdo lëvizje e rekomanduar nga ekspertët ka të bëjë me lehtësimin e presionit, uljen e tensionit, mbrojtjen e shtyllës kurrizore dhe forcimin e muskujve.

Nëse jeni shtrirë në shpinë, atëherë për të shmangur presionin shtesë në pjesën e poshtme të shpinës, duhet t’i keni këmbët pak të ngritura. Kjo arrihet duke vendosur një jastëk nën gjunjë – duke reduktuar presionin në pjesën e poshtme të shpinës me 50%.

Ndryshoni këpucët 

Për të shmangur dhimbjet e shpinës, vishni këpucë të rehatshme me tak të ulët – thembra nuk duhet të kalojë 2.5 cm – veçanërisht kur qëndroni në këmbë për një kohë të gjatë.

Drejtoni shpinën

Mos i përkulni shpatullat tuaja. Pavarësisht nëse jeni ulur ose në këmbë, sigurohuni që shpina juaj të jetë drejt. Përndryshe ngarkohet shtylla kurrizore, veçanërisht beli. Nëse është e nevojshme, vendosni një jastëk në karrige për të shtrirë shtyllën kurrizore.

Mos pini duhan

Duhanpirësit kanë më shumë gjasa të përjetojnë dhimbje shpine sesa jo duhanpirësit. Pirja e duhanit gjithashtu redukton oksigjenimin e gjakut, pra edhe ushqimin e muskujve dhe tendinave, duke rritur cenueshmërinë e shpinës.

Mos mbani peshë vetëm në një anë

Shmangni mbajtjen e sendeve të rënda dhe nëse nuk mund ta shmangni, sigurohuni që ta ndani peshën midis dy krahëve ose shpatullave. Nëse keni çanta, ndajini ato në dy duar. Gjithashtu kur mbani sende të rënda mbajini gjunjët pak të përkulur.

Bëni shtriqje

Mos humbisni një mundësi për të zgjatur p.sh. kur zgjoheni në mëngjes, pas orëve të gjata qëndrimi ulur ose në këmbë në një pozicion të caktuar. Shtriqja përmirëson qarkullimin e gjakut në shtyllën kurrizore dhe lehtëson shqetësimet e vogla për shkak të mungesës së lëvizjes.