Deputetët nga e hëna në punë, seancë plenare për zgjedhjen e kryetarëve dhe anëtarëve të komisioneve

Kuvendi nga e hëna i hap dyert për deputetët. Partitë politike u dakorduan për emërimin e kryetarëve dhe anëtarëve të 20 komisioneve parlamentare. Pritet që të votojnë të gjithë deputetët për shkak se partitë kanë arritur konsensus dhe në grupet e punës ka kryetarë dhe anëtarë nga të gjithë partitë. Me nga 8 komisione do të udhëheqin LSDM dhe VMRO-DPMNE, 3 BDI dhe 2 Aleanca për Shqiptarët.

“Me konsensus u dakorduam për secilin komision kush do të përfaqësojë”, tha Micevski.

Kryetari i Kuvendit, Talat Xhaferi, nuk pret që të paraqitet problem për sigurimin e shumicës edhe pse pushteti për momentin ka vetëm 60 deputetë.

“Në lidhje me kuorumin, nuk ka asnjë frikë për shkak se ky është konsensus i partive politike që janë të përfaqësuar në grupet e punës”.

Të hënën duhet të verifikohet edhe mandati i deputetes Emilija Rambabova, që do të zëvendësojë ministren Jagoda Shahpaska. Deputeti Arben Ziberi nesër duhet të bëjë test për kovid-19, prej çka do të varet se a do të votojë ai ndaras nga deputetët e tjerë.