Denoncimi për bombë paralizoi transportin publik! Autobusët parkohen para Qeverisë, të punësuarit në grevë

Kaos i vërtetë me transportin publik këtë mëngjes. Për shkak të një denoncimi për bombë, të gjithë autobusët u shkyçën nga komunikacioni dhe u parkuan në garazh ku janë kontrolluar nga Njësia antiterror e Ministrisë së Brendshme. Sipas informacioneve, denoncimi është dërguar përmes e-mail nga një person i punësuar në NQP. Ministri i Punëve të Brendshme, Oliver Spasovski tha se personi është arrestuar dhe se hetimi për rastin po vazhdon.

“Hetimi për denoncimin në fjalë është duke vazhduar. E-maili është dërguar nga një i punësuar në NQP “Shkupi”. Personi është arrestuar dhe shërbimet kompetente po punojnë me të. Në mënyrë paralele po vijon edhe kontrolli antiterrorist”, tha Oliver Spasovski, ministër i Punëve të Brendshme.

Pasi u kontrolluan autobusët, disa prej tyre filluan të kyçen në komunikacion, ndërsa disa të tjerë u parkuan para godinës së Qeverisë. Të punësuarit janë në grevë për shkak të vonesës së pagave, ndërsa udhëheqësia e Ndërmarrjes Publike në protestë. Sindikatat e NQP-së të hënën alarmuan për vonesën e rrogave.

“U dakorduam që nesër të vijmë me familjet tona në orën 4:30 të mëngjesit. Kryetarja dhe Qyteti i Shkupit morën rrogë, barku i tyre është i mbushur, kurse ne jemi të uritur. Sot është 19, kur do t’i marrim rrogat? Kur do të hamë? Edhe ne kemi fëmijë, siç i kanë edhe ata, edhe drejtori”, tha Afrim Muça, kryetar i Sindikatës së Pavarur të vozitësve të NQP-së Shkup.

Njeriu i parë i Lidhjes së Sindikatave të Maqedonisë, Darko Dimovski mbështeti grevën dhe tha se nuk duhet lejuar të ndodhin situata të këtilla, sidomos me transportin publik.

“Apeloj deri te kryetarja të mos gënjejë se nesër ndonjë autobus do të dalë për të kryer veprimtarinë – transport publik”, pohoi Darko Dimovski, kryetar i LSM-së.

Nga Sindikata e punëtorëve për Komunikacion dhe Lidhje, porositën se në qoftë se deri më datën 15 çdo muaj, siç parashihet me afatin ligjor, nuk i marrin rrogat e tyre, menjëherë ditën që vjen asnjë autobus nuk do të qarkullojë nëpër rrugët e qytetit.

“Mund të flasim për gjëra të tjera, për të drejtat e marrëdhënieve pune, por për rrogat nuk ka më bisedime. Afati ligjor për pagën është data 15, nëse kalon data 15 në muaj, autobusi i NQP-së nuk do të qarkullojë në linjën e tij”, pohoi Miqo Stojanovski, Sindikata e Punëtorëve për Komunikacion dhe Lidhje.

Nga Qyteti i Shkupit fajin për gjendjen aktuale ia hedhin Ministrisë së Arsimit, e cila, siç thonë, ka borxh prej 2 milionë eurove ndaj ndërmarrjes për transportin e nxënësve dhe studentëve, si dhe disa komunave të Shkupit të cilat i kanë borxh NQP-së 40 milionë denarë.

“Ky presion që po ushtrohet me mos pagimin, kontribuon që Ndërmarrja e Qarkullimit Publik të funksionojë me vështirësi dy muajt e fundit të këtij viti. Vështirësitë do të tejkalohen, pagat nuk vonojnë, vonesa është 2-3 ditë dhe e njëjta do të realizohet”, pohoi Zoran Gligorov, sekretar në qytetin e Shkupit.

Qeveria përmes një kumtese ashpër hodhi poshtë akuzat dhe porositi se nuk kanë asnjë borxh ndaj Qytetit të Shkupit. Prej atje shtojnë se për biletat studentore nuk janë planifikuar mjete financiare, sepse studentët në vitin akademik 2021/2022 kanë ndjekur ligjerata online.

Qeveria topin ua hedh komunave, të cilat, siç thotë, në mënyrë të pandërgjegjshme menaxhojnë me mjetet për transportin e nxënësve dhe nuk i kryejnë obligimet në kohë. Dhe derisa vazhdojnë përplasjet mes Qytetit të Shkupit dhe Qeverisë, të punësuarit në NQP nuk morën përgjigje konkrete – se kur do t’i marrin rrogat e tyre.