Demolohet stadiumi i Zajazit, riparimi i tij u bë vetëm para një viti

Nuk kaloi një vit pasi që u rikonstrua, stadiumi i futbollit në Zajaz është demoluar në mënyrë vandale. Ky stadium i shërbente fshatit dhe rrethinës si dhe Klubit të futbollit Zajazi, por siç shihet ditë më parë dikush pa arsye ka shkatërruar objektet e gardërobës, xhamat e mobiljet.

“Ndodhemi në Stadiumin e Zajazit, ditë më parë në këtë stadium të dy objektet e zhveshtoreve janë shkatërruar tërësisht, janë thyer dyert janë thyer dritaret dhe janë shkatërruar të gjitha mobiljet brenda zhveshtoreve. Policia po merr masa në zbardhjen e rastit por ende nuk dihet arsyeja pse ka ndodhur kjo. Kanë reaguar edhe nga Bashkësia Lokale dhe presin që rasti të zbardhet në tërësi”, raporton Salije Sadiku Pinjolli, gazetare TV21.

Nga Bashkësia Lokale nëpërmjet një shkrimi thonë se ndjehen të indinjuar nga kjo ngjarje.

“Jemi thellësisht të indinjuar nga demolimi i objekteve të stadiumit në fshatin Zajaz, nuk e dimë arsyen e këtij akti barbarë të kësaj fushe e cila është e nevojshme jo vetëm për Zajazin por edhe për rrethinën. Me përkushtim kërkojmë të zbardhet e vërteta dhe të kapen autorët.
Urojmë që situata të tilla të mos përsëriten sepse kjo është në dëm të të gjithëve e më shumë në dem të rinisë së vendit”, thonë nga Bashkësia Lokale e Fshatit Zajaz Xhuma.

TV21 mëson jozyrtarisht se këtë vepër e kanë kryer persona të mitur nën moshën 18 vjeçare të fshatit Zajaz. Sipas informacioneve tona policia i ka kapur autorët, është dokumentuar rasti dhe pritet që të merren masat e mëtutjeshme.

Kujtojmë për stadiumin e Zajazit vitet e kaluara TV21 ka raportuar disa herë për shkak se ishte lënë në harresë dhe ishte shndërruar në deponi mbeturinash, por pas disa kronikash Agjencia për Rini dhe Sport në vitin 2022 ndau 130 mijë euro për rregullimin e tij.