Debllokimi i Kuvendit vetëm nëse ka Ligj të ri për shtetësinë, LSDM-ja dyshon se DPMNE-ja po e nxit opozitën shqiptare

Partia në pushtet Lidhja Socialdemokrate dyshon se opozitarja VMRO-DPMNE po e nxit opozitën shqiptare Aleanca-Alternativa për bllokim të Kuvendit me amendamente. Këtë e pohon koordinatori i grupit parlamentar të socialdemokratëve Jovan Mitreski.

“Mua me të vërtetë më vjen keq që nga kjo që e bën opozita shqiptare mund të dilet me vetëm dy konkluzione logjike. E para është se janë në marrëveshje me VMRO-DPMNE-në për bllokim të Kuvendit, sepse sa kam kuptuar, mllefi i tyre është se VMRO-DPMNE e ka bllokuar ligjin me shumë amendamente. Ose përfundimi i dytë logjik është se VMRO-DPMNE i ka tërhequr në gjendje të këtillë që të mos jenë bllokuesit e vetëm të Kuvendit”, deklaroi Mitrevski.

Po për dallim nga këto pohime të deputetit të shumicës, koordinatori i grupit parlamentar i opozitares VMRO-DPMNE-së, Nikolla Micevski, mendon që do të ishte mirë që Aleanca-Alternativa ta tërheqë ligjin e më pas të ulen e të merren vesh për një tekst të ri.

“Për shkak se amendamentet janë dorëzuar, janë ato që janë, afati sipas rregullores ka kaluar, mendimi im personal është se një zgjidhje e këtillë ligjore duhet të tërhiqet nga ana e kolegëve të Aleancës dhe Alternativës dhe pas bisedimeve sërish të dorëzohet nga ana e tyre ligj ku do të përfshihen të gjitha vërejtjet për të cilat ka dyshime dhe ajo zgjidhje ligjore të kalojë”, vlerëson Micevski.

Po shefi i grupit parlamentar i opozitës shqiptare, Skender Rexhepi, thotë se propozim-ligjin mund ta tërheqin vetëm pasi të jenë marrë vesh për një ligj të ri.

“Ne parimisht nuk biem në kurthet që mund t’i përgatisin të tjerët. Ne jemi në gjendje të diskutojmë për një propozim ligj, ta adaptojmë propozimin aktual jashtë seancës së komisioneve, që pastaj nëse jemi dakord të gjithë përfaqësuesit e subjekteve politike për atë propozim ligj, ne mund ta tërheqim propozimin aktual dhe të njëjtin ta fusim në rend dite me procedurë të shpejtuar. I vetmi kusht është ky, fillimisht e diskutojmë versionin e ri me të gjitha ndryshimet, pastaj e bëjmë debllokimin apo tërheqjen e ligjit aktual”, bëri të ditur Rexhepi.

Të gjitha palët janë të gatshme për t’u ulur dhe të gjejnë një zgjidhje. Takime joformale ka në vazhdimësi. Si LSDM po ashtu edhe VMRO-DPMNE konsiderojnë se propozimligji i Aleancës-Alternativës nuk është sipas standardeve ndërkombëtare për marrje të shtetësisë. Për këtë VMRO-DPMNE ka dorëzuar rreth 500 amendamente. Pas kësaj, opozita shqiptare filloi me kundërpërgjigje duke dorëzuar deri më tani rreth 14 mijë amendamente e duke bllokuar kështu ligje të ndryshme në Kuvend. Thonë se reciprociteti është arma e tyre e vetme në këtë rast. Ndërkaq pushteti vazhdimisht i kritikon se me bllokimin e ligjeve po goditen qytetarët.