Nga data 10 deri më 12 korrik, fshati magjepsës i Galiçnikut do të jetë sërish nikoqir i njërës prej manifestimeve më autentike kulturore në Maqedoni — “Dasma e Galiçnikut”.
Mijëra vizitorë nga vendi dhe jashtë do të kenë mundësinë të jenë pjesë e kësaj tradite shekullore, të mbushur me veshje autentike, këngë dhe valle popullore.
Në qendër të vëmendjes këtë vit do të jenë çifti i ri Aleksandar Pendaroski dhe Martina Mihajlova, zgjedhja e të cilëve mbart një simbolikë të veçantë — këtë vit shënohen 35 vjet nga dasma e parë moderne e Galiçnikut e mbajtur në vitin 1991, kur u martuan pikërisht prindërit e Aleksandarit.