Çka thanë deputetët para se të hyjnë në Kuvend? Mexhiti e Ziberi janë pro që Xhaferi të zgjidhet për Kryeparlamentar

Për dallim nga dje sot kishte edhe ftes zyrtare nga Kuvendi për mbajtjen e seancës për zgjedhjen e kryeparlamentarit.  Të parët para Kuvendit u panë deputetët e VMRO-DPMNE-së.

Më pas erdhi deputeti Izet Mexhiti.  U pyet se a ka pasur përçarje mosmarrëveshje brenda BDI-së për ndarjen e resorëve, por ai tha se BDI është parti demokratike dhe debatet janë në frymën e demokracisë.

Izet Mexhiti: “Talat Xhaferi është njeri i duhur, është kryetari më i suksesshëm në Parlamentin republikan, njeriu që i ka thyer tabutë. D.m.th. që shqiptari jo që mund të jetë Kryetar Parlamenti, por mund të jetë edhe më i suksesshmi.

TV21: Si i komentoni zërat që ishin në opinion?

Izet Mexhiti: “Bashkimi Demokratik për Integrim është parti me traditë parti demokratike ku debatohet dhe në fund qëndrimet janë unanime”.

Sot ishte më i qetë për dallim nga dje edhe deputeti i sapozgjedhur Arben Ziberi, i cili dje për pak sa nuk e theu makinën duke dal nga Kuvendi.

U pyet edhe për ditën e djeshme kur ishte i nervozuar por këtë gjë Ziberi e mohoi.

 “Jo nuk ishte ajo e vërtet, ndodhi një incident aty tek dalja. Nuk kishte ndonjë mosmarrëveshje. BDI është parti demokratike dhe ka debate. Është shumë normale janë qëndrime të harmonizuara dhe ne vazhdojmë përpara pasi që kemi fituar besimin e popullit për ti ec proceset në të ardhmen”, tha deputeti Arben Ziberi nga BDI.

Kryetari i PDH-së Menduh Thaçi nuk deshi të komentojë për përbërjen e re Qeveritare.

Deputeti i LSDM-së, Muhamed Zekiri para hyrjes së Kuvendit tha se Xhaferi do të mbahet mend si kryeparlamentari që amnistoi Trajko Veljanoskin.

 “Do të mbahet mend se është kryetar i vetëm që ka amnistuar një kriminel si Trajko Veljanoski”, theksoi Muhamed Zekiri, deputeti i LSDM-së.

Edhe sot deputetët pasi nënshkruanin praninë e tyre, tek dera u kontrollohej temperatura, si masë për mbrojtje nga Covid-19.