Buxheti për projektet shqiptare nga 40% ra në 16%! Aziri i bën thirrje Stefoskës që t’i rishqyrtojë rezultatet

Në 5 vitet e fundit të paktën 30% e buxhetit ka shkuar për kulturën shqiptare në kuadër të projekteve me interes nacional. Në kohën kur Ministër ishte Hysni Ismaili, buxheti ishte 40%. Po këtë vit, Ministrja e Kulturës Irena Stefonska, vendosi që vetëm 16% të ndahet për projektet shqiptare. Sekretari shtetëror në Ministrinë e Kulturës, Valmir Aziri, thotë se kjo po krijon precedent që në të ardhmen rrezikon që një proces artistik të shndërrohet në teknik.

Valmir Aziri: “I gjithë procesi ligjërisht i takon ministrshës”.

TV21: Po kështu ka funksionuar gjithmonë?

Valmir Aziti: “Jo, nuk ka funksionuar për hir të së drejtës, të gjithë ministrat paraprak, ku unë kam pasur rastin të punoj me 3 ministra, para ministreshës Stefonska, të gjithë kanë qenë ministra “open minded” (mendjehapur), kanë krijuar proces gjithëpërfshirës, kanë inkuadruar të gjithë aktorët më me rëndësi  të kulturës në vend dhe është sjellë lart-poshtë një program e pëlqyeshme dhe pranueshme nga të gjitha palët”.

TV21: Keni pasur d.m.th një farë konsensusi mes vete?

Valmir Aziri: “Jo konsensusi mes neve si funksionarë, por konsensusi mes botës së artit, mes komunitetit artistik ka pasur një lloj konsensusi”.

Aziri thotë se programi është bërë sipas pikëpamjeve të ministreshës për kulturën, ndërsa beson se ajo nuk ka vepruar drejtë. Në pamundësi për të ndërhyrë ligjërisht, sekretari shtetëror bën thirrje që programi të rishqyrtohet, sepse siç thotë, janë ndërprerë projekte të rëndësishme për shqiptarët. Po si duket Stefoska nuk e ka ndërmend ta bëjë këtë gjë. Nga Kabineti i saj edhe sot ripërsësitën qëndrimin se sipas ligjit Ministri vendos për rezultatet.

 “Në afat prej 15 ditësh nga marrja e vendimit, pjesëmarrësit e pakënaqur në Konkurs kanë të drejtë të dorëzojnë ankesë deri te Komisioni shtetëror për vendimmarrje në procedurë administrative dhe procedurë nga marrëdhënia e punës në shkallë të dytë”, thonë nga Ministria e Kulturës.

Me rezultatet e konkursit nuk pajtohet as zëvendësministri Sedat Sulejmani, por edhe ky në një deklaratë për TV21 pak ditë më parë tha se është anashkaluar në proces, me arsyetimin se është kompetencë e Ministres.

Po opozita shqiptare nuk do t’ia dijë. Të rinjtë e koalicionit Aleanca-Alternativa i dhuruan ministres dy kukulla, si shenjë se edhe zëvendësministri e sekretari kanë pranuar rolin e kukullës në këtë ministri.

 “Thjesht janë dy administratorë që vijnë e shkojnë, marrin rroga e beneficione, se janë vetëm për të bërë foto patetike, por nuk janë asgjë më shumë se kukulla. E themi këtë për shkak se kukullat nuk i pyet askush për asgjë, njësoj siç e pranuan vetë ata. Prandaj, ne sot ia kemi sjellë ministres Stefkoska dy kukulla të bukura, bile pa gjini të përcaktuar – siç i ka qejf ajo, që të luajë me to, në vend se të tallet me funksionarët shqiptarë të kësaj ministrie dhe të na ofendojë të gjithë neve si shqiptarë”, theksoi Afan Elezi – nga Forumi rinor i ASH-AAA.

Publikimi i rezultateve për projektet me rëndësi nacionale solli reagime dhe pakënaqësi të shumë artistëve, botuesve e organizatorëve të festivaleve shqiptare. Kishte edhe nga ana që kërkuan tërheqjen e rezultateve, por se si do të veprohet e a do të ndërmerret diçka, mbetet ende pikëpyetje.