Në Bullgari po mbahen sot zgjedhjet e parakohshme parlamentare, të tetat me radhë brenda pesë viteve të fundit, në një klimë të thellë krize politike.
Sipas anketave, favorit shihet Rumen Radev, i cili garon me koalicionin e qendrës së majtë “Bullgaria Progresive” dhe premton një fillim të ri për vendin.
Ai deklaroi se synon të sigurojë një shumicë të plotë, duke e paraqitur forcën e tij si alternativë ndaj “kartelit të korruptuar” të partive tradicionale.
Fushata është shoqëruar me përplasje të forta politike, ku ish-kryeministri Bojko Borisov e krahasoi Radevin me kryeministrin hungarez Viktor Orbán.
Borisov tha se Bullgaria po përballet me një “Orbán të ri”, duke ngritur shqetësime për drejtimin politik të vendit.
Nga ana tjetër, analistja Evelina Slavkova vlerëson se nuk ka gjasa që Radev ta orientojë vendin drejt Rusisë, por kritikon mungesën e qartësisë në këtë drejtim gjatë fushatës.
Ajo theksoi rëndësinë e anëtarësimit në NATO dhe Bashkimin Evropian si garanci për stabilitetin e vendit.
Këto zgjedhje vijnë pas dorëheqjes së qeverisë konservatore në dhjetor dhe një periudhe të gjatë paqëndrueshmërie, ku që nga viti 2021 asnjë qeveri nuk ka zgjatur më shumë se një vit, duke rritur mosbesimin dhe apatinë e votuesve.