Bullgaria me Parlament të ri jostabil! Pritet formimi i Qeverisë, me të cilën duhet të negociojë Shkupi

TË FUNDIT

U konstituua përbërja e 46-të e Parlamentit të Bullgarisë. 240 deputetë bënë betimin! Me 137 vota “për” kryetare e zgjodhi Iva Mitevan nga partia “Ka një popull të tillë”. Pritet të propozojë që deputetët të mos bëjnë pushime verore, pasi në muajt e fundit Parlament nuk ishte funksional. Nënkryetari i partisë “Ka një popull të tillë”, që fitoi më shumë mandate, Toshkov Jordanov, dha shpresë që Brenda dy javësh të formohet qeveria.

“Gjatë 14-15 ditëve të ardhshme, duhet të ketë një qeveri për të vazhduar punën e kabinetit të përkohshëm. Nëse jo, probabiliteti për të shkuar në zgjedhje të parakohshme është i lartë”, tha Toshkov Jordanov – “Ka një popull të tillë”.

Koalicioni GERB-SDS, pjesë e të cilit është ish-kryeministri Bojko Borisov, po synon të mbetet opozitë. Desislava Atanasova, tha se detyra komplekse e vendosur nga shoqëria Bullgare nuk do të zgjidhet as në parlamentin e 46-të.

 “Ne jemi dëshmitarë të copëtimit të sistemit politik dhe pamundësisë së formimit të një qeverie.  Grupi parlamentar do të ishte një opozitë e orte dhe kompetente ndërsa kundërshtari ynë do të ishte “kaosi dhe mosveprimi”, u shpreh Desislava Atanasova – GERB-SDS.

Ai që përmendi kontestin mes Shkupit dhe Sofjes ishte Hristo Ivanov nga “Bullgaria Demokratike”, I cili tha se është i detyrueshëm dialog me ata me të cilët shohim në të njëjtin drejtim.

 “Ky parlament duhet të mbrojë interesin kombëtar bullgar në lidhje me Republikën e Maqedonisë së Veriut, për të mbrojtur të vërtetën, por gjithashtu për të gjetur një mënyrë për t’u bërë anëtarë të familjes evropiane së bashku”, potencoi Hristo Ivanov – “Bullgaria Demokratike”.

Pas përfundimit të seancës konstituive të Kuvendit nacional, Kryetarja e porsazgjedhur e Kuvendit tha se ky parlament nuk do të jetë më i lehtë se ai paraprak. Siç njoftoi korrespondenti i MIA-s nga Sofja, Miteva pret që presidenti i Bullgarisë së shpejti do të fillojë me procedurën e formimit të Qeverisë së re në vend. Ndërkaq Presidenti, Rumen Radev, në hyrje të Kuvendit u shpreh i bindur  se kësaj radhe partitë parlamentare duhet të formojnë qeveri funksionale. “Detyrat dhe mesazhet janë të njëjta, sikurse edhe para tre muajve”, shtoi ai. Edhe Kryeministri i përkohshëm, Stefan Janev, pas përfundimit të mbledhjes konstituive, tha se shpreson që në një kohë sa më të shkurtë do të formohet qeveria funksionale. Bashkë me Sofjen, kërshëri për të parë se si do të rrjedhë formimi i Qeverisë së re bullgare ka edhe Shkupi.

 “Është shumë e rëndësishme që të formohen institucionet në R.e Bullgarisë që të mund të kemi dialog që mund të prodhojë rezultate. Unë vazhdimisht isha i qëndrimit se qeveria teknike mund të japë rezultate sepse edhe konferenca ndërqeveritare është proces teknik. Vendim politik tashmë kemi për nisje të bisedimeve por me sa duket kjo tregon nëse objektivisht, apo duke u shfrytëzuar si argument, megjithatë u tregua se në kushte të mospasjes së Kuvendit dhe Qeverisë, nuk ka mundësi të tejkalohet kjo çështje, dhe nga këtu primare dhe thelbësore është nëse nga ky Kuvend që u konstituua sot do të prodhohen institucione dhe do të ketë Qeveri”, u shpreh Bujar Osmani – Ministër i Punëve të Jashtme të Maqedonisë.

Ministri i Jashtëm Osmani tregoi po ashtu edhe për takimin në Dubrovnik me zëvendësministrin bullgar për punë të jashtme me të cilin tha se ka folur që pas formimit të qeverisë bullgare, menjëherë do të nisë komunikimi rreth dokumentit Udhërrëfyes për zgjidhje të kontestit, me ndihmën edhe të kryesimit slloven për çështje e tjera që trajton.