Bullgaria konfirmon veton në Luksemburg?

Mëngjesi i sotëm i mblodhi në Luksemburg Ministrat e Jashtëm të vendeve anëtare të Bashkimit Evropian, për herë të parë me prani fizike, pas lirimit të masave anti-kovid, por Bullgaria nuk bën asnjë lëshim ndaj Maqedonisë së Veriut për nisje të bisedimeve.

Agjencia Mediatike Informative, duke u bazuar në burime diplomatike në BE-së, shkruan se në takim Bullgaria ka refuzuar të lëshojë pe, edhe krahas paralajmërimeve nga vendet anëtare të BE-së se me këtë bllokadë “BE-ja po qëllon veten në këmbë”.
Sipas të njëjtave burime, më këmbëngulëse ishte Gjermania, e cila ka treguar përpjekje të fuqishme për fillim të negociatave me Maqedoninë e Veriut. E para se të niste takimi, Ministri i Gjermanisë për çështjet e Evropës, Mihajl Rot, tha se është e papranueshme që probleme dypalëshe të bëhen pengesë e vendimeve të rëndësishme siç është nisja e bisedimeve.

“Nuk kam asnjë mirëkuptim që këto vendimet të nevojshme janë nën hijen e konflikte bilaterale, që nuk i përkasin nivelit të BE-së, mund të diskutohen në kornizë të BE-së, dhe ne jemi atje, por këto janë probleme dypalëshe. Komisioni, Qeveria Federale janë të mendimit se Shqipëria dhe Maqedonia e Veriut kanë përmbushur pjesën e tyre të angazhimeve dhe më në fund mund të fillojnë me negociatat dhe duhet të jetë e qartë se BE në tërësi, i mbështetur nga 27 vendet anëtare, tani po dërgon sinjal për zbatimin e premtimeve të bëra. Tani patjetër duhet të bëjmë diçka dhe shpresoj që sot do të arrijmë vendime të arsyeshme”, tha Rot.

Ministrat e Jashtëm të vendeve të tjera anëtare përgjithësisht me mesazhe se negociatat duhet të nisin!

“Shqipëria dhe Maqedonia e veriut i kanë përmbushur të gjitha kriteret dhe do të donim të shihnim hapjen e negociatave sa më shpejtë që është e mundur”, tha Gordan Gërliç Radman – ministër i Jashtëm i Kroacisë.

“Uroj të kemi rezultate të mira. Duhen lajme të mira për besueshmërinë në BE”, tha Martin Klus – ministër i Jashtëm i Sllovakisë.

Para takimit, edhe sekretari i shtetit në ministrinë e jashtme të Sllovenisë, tha se shpreson për diskutime të mira rreth zgjerimit. Përfaqësuesi i Irlandës po ashtu theksoi se zgjerimi është çështje kyçe dhe për ta.
Pritet që sot të zhvillohet mbledhja ndërqeveritare mes Bashkimit Evropian, Serbisë dhe Malit të Zi. Pas mbledhjes së sotme në Luksemburg, pritet që diskutimet të vazhdojnë në Bruksel në datat 24 dhe 25 qershor.