Brukseli pret me ankth rezultatin e zgjedhjeve në Itali

TË FUNDIT

Ndërsa italianët bëhen gati t’i drejtohen qendrave të votimit, institucionet evropiane po ndjekin me vëmendje atë që po ndodh në ekonominë e tretë të bllokut. Lufta në Ukrainë, kriza e energjisë dhe politikat e emigracionit kanë gjasa të përcaktojnë marrëdhënien e Italisë me bllokun.

“Është një vend i madh, me një ekonomi të madhe dhe që ka fjalën e tij në politikat evropiane. Për këtë arsye ajo që ndodh në Romë ka një impakt direkt në Bruksel dhe dinamika e negociatave për politikat e mëdha të BE-së varet nga kush është në pushtet në Romë”.

Disa nga kandidatët për kryeministër, si Enriko Letta nga Partia Demokratike, Giuseppe Conte nga Lëvizja 5 Yjet dhe Silvio Berlusconi nga Forza Italia e kanë mbajtur këtë post në të kaluarën. Ndërsa Matteo Salvini nga Liga e Veriut dhe Giorgia Meloni nga Vëllezërit e Italisë, e konsideruar ylli në ngjitje i koalicionit të djathtë, mund ta kenë risi.

Edhe pse kohët e fundit ata i kanë zbutur tonet, analistët në Bruksel thonë se perceptohen ende si më euro-skeptikët në rastin më të mirë dhe më anti-evropianët në rastin më të keq.

“Sa i takon ekonomisë dhe emigracionit, ndoshta ata do të prishin konsensusin këtu në BE, ose do t’i bëjnë kompromiset dhe vendimmarrjet më të vështira. Dhe natyrisht, nëse shohim shembullin e Polonisë, Hungarisë dhe radikalëve të tjerë në qeveri, sundimi i ligjit dhe demokracia vihen në dyshim. Ky është një problem për gjithë BE-në”.

Zyrtarët e BE-së nuk mund të bëjnë komente mbi çështjen, por gjerësisht besohet se blloku e pret me ankth ardhjen e një qeverie të re, të paparashikueshme, sidomos kur bëhet fjalë për një vend anëtar.

“Pikërisht në rastin e Italisë, mendoj se burokracia dhe e ashtuquajtura flluskë e Brukselit do të ndiheshin më mirë me qeveritë e kaluara të qendrës së majtë të spektrit politik italian, me të cilin janë mësuar të negociojnë”.

Një qeveri e drejtuar nga një parti e djathtë ka gjasa të jetë më nacionaliste se ato të mëparshme dhe më e vendosur të diskutojë rregullat fiskale të BE-së. Ndërsa një qeveri e majtë mund të ofrojë pikëpamje mbi politikat më konsensuale me qarqet vendimmarrëse të Brukselit. Megjithatë, cilido që do të jetë kryeministër, edhe atij do t’i duhet të përballet me Evropën.

error: Content is protected !!