Ka dy muaj që Komuna Qendër dhe Ministria e Kulturës ia hedhin njëra-tjetrës përgjegjësinë për Portën “Maqedonia” dhe Shtëpinë Monument të Nënë Terezës.
Qeveria i ka dërguar mendim Komunës që pullat e këtyre dy objekteve të fshihen nga Plani Detal Urbanistik për Unazën e Vogël, por Komuna nuk vepron sepse pret përgjigje nga Ministria e Kulturës, e këta të fundit thonë se këtë punë në fakt në dorë e ka Komuna.
“Ministria është investitor i kompozicionit struktural “Nënë Tereza” dhe të Portës “Maqedonia”. Por, Komuna ka kompetenca mbi planifikimin, lejet për ndërtim si dhe shpalljen e ndërtimeve të egra dhe ndërmarrjen e veprimeve ndaj tyre, gjë që nuk është kompetencë e Ministrisë së Kulturës”, thonë nga Ministria e Kulturës.
Kryetari i Qendrës, Sasha Bogdanoviq sot nuk iu përgjigjet mesazheve dhe thirrjeve të TV21 rreth kësaj çështjeje. Jo më larg se pesë ditë më parë ai tha të kundërtën e kësaj që pohon Ministria, pra se po pret përgjigje nga Ministrja e Kulturës, Irena Stefoska, se si duhet të veprohet për Portën triumfale dhe Shtëpinë e Nënë Terezës.
“Kam përmendur disa herë se bëhet fjalë për plan kompleks, jo vetëm për përgjegjësi dhe kompetenca të Komunës, por edhe shtetit dhe Qytetit, presim përgjigje adekuate nga ta që të dimë se si të veprojmë me objekte ose vende që s’janë nën kompetencat tona dhe nuk mundet ne si komunë të veprojmë”, tha Sasha Bogdanoviq – kryear i Komunës Qendër.
Ndërkaq nga Ministria e Kulturës, thanë për TV21 se sipas gjitha mendimeve, sugjerimeve dhe dokumentacioni, e mbështesin përcaktimin e Qeverisë për zgjidhje të projektit joligjor. Tregojnë po ashtu se në proces është rishqyrtimi i statusit të Portës Maqedonia.
Qeveria ka kërkuar rishikim të Plani Urbanistik, ndërsa në një sqarim shtesë patën thënë se nuk kërkojnë që objektet të rrënohen, por Kryetari i Shkupit, është më i drejtpërdrejtë.
“Komisioni profesional që e formoi qeveria diku në vitin 2017 thotë se bëhet fjalë për ndërtim të egër. Dihet se si trajtohen ndërtimet e egra. Nëse dikush konsideron se kjo është radikale, definitivisht mendoj se ajo që ne e quajnë Portë Triumfale, mund të ketë qëllim dhe pamje tjetër”, u shpreh Petre Shilegov – Kryetar i Qytetit të Shkupit.
Krahas Portës dhe shtëpisë së Nënë Terezës, edhe fasadat e ndërtesave dhe anijet në Vardar janë parapara të hiqen. Grupi i Punës i formuar në 2017-tën në Ministrisë së Kulturës për pasojat e projektit “Shkupi 2014” vërtetoi se ka dëshmi të pakontestueshme se bëhet fjalë për shkelje të të gjitha ligjeve që e rregullojnë materien e ngritjes së përmendoreve, që lidhen me buxhetin, prokurimet publike si dhe ligjet për ndërtim dhe planifikim urbanistik.