“Besim në prokuror të pushtetit aktual?!” Bytyqi kërkon reforma sistematike, Toshkovski pret luftëtarë kundër krimit

Propozimi për shkarkimin e kryeprokurorit Lupço Kocevski pritet të gjendet në seancë qeveritare të martën. Nga Ministria e Drejtësisë pohojnë se po punojnë në draft-tekstin. Në ndërkohë, përfaqësues të pushtetit thonë se nuk po vijojnë diskutimet për emrin e pasardhësit të Kocevskit, por se dëshirojnë që ai të jetë profesionist.

“Prokuror i cili do të jap kontribut më të madh në suaza të legjitimitetit për luftën kundër krimit të organizuar dhe korrupsionit të lartë te qytetarët”, tha Pançe Toshkovski.

Nga ana tjetër, përfaqësues të opozitës vlerësojnë se së pari duhet të reformohet sistemi gjyqësor e më pas zgjidhjet kadrovike t’i bëjnë vetë ekspertët e fushës. Sipas deputetit të LSDM-së, Fatmir Bytyqi, i cili ishte në Daily Click, do të ngritet edhe çështja për besimin e kryeprokurorit të ardhshëm për shkak se ai do të jetë propozim i pushtetit aktual.

“Ndryshim i emrave, ndryshim i disa individëve të caktuar, por moskrijimi i sistemit të ri të reformuar, nuk do të ofrojë asgjë të re”, deklaroi Fatmir Bytyqi

Kocevski paraprakisht theksoi se nuk do të dorëzojë dorëheqje, edhe pse këtë e kërkoi kryeministri Hristijan Mickoski, sipas së cilit, prokurori ka pasur kohë që të dëshmohet. Kocevski vlerëson se ka punuar në harmonizim me ligjin dhe se nuk ka kryer shkelje të rëndë disiplinore, siç thotë pushteti. Nga Qeveria akuzojnë se ai është fajtor për besimin e dobët në gjyqësor, gjersa opozita pohon se po kryhet sulm ndaj sistemit gjyqësor.