Bashkimi Evropian kumtoi sot se ka pranuar të blejë të paktën 300 milionë doza të një vaksine të mundshme kundër koronavirusit të ri nga AstraZeneka (AstraZeneca).
Ky është furnizimi i parë evropian i vaksinave që është dakorduar paraprakisht, i cili mund t’i minojë planet e Organizatës Botërore të Shëndetësisë (OBSH) për një qasje globale.
Komisioni Evropian, i cili negocion në emër të të gjithë 27 anëtarëve të Unionit, tha që marrëveshja përfshin mundësinë e blerjes së 100 milionë dozave të tjera shtesë nga kompania britanike, nëse vaksina e tyre vërtetohet e sigurt dhe efektive. Marrëveshja e arritur sot vijon pas marrëveshjes së arritur në parim me AstraZeneka në qershor.
Komisioni publikoi që qëllimi i marrëveshjes së tyre të re është financimi i një pjesë të shpenzimeve për prodhimin e vaksinës. Brukseli gjithashtu theksoi se në dy javët e fundit ka biseduar me Xhonson/Xhonson dhe Sanofi, ndërsa në korrik kumtoi se është në bisedime me Fajzer, Moderna dhe KjurVakom.