Komisioni Evropian së bashku me Bankën për investime evropiane ka ndarë 3.3 miliardë euro për shtetet e Ballkanit Perëndimor për të zbutur pasojat ekonomike të shkaktuara nga virusi korona.
Këtë vendim e ka sjellë sot Komisioni Evropian, ndërsa ka për qëllim mbështetjen ndaj masave urgjente shëndetësore e humanitare dhe ekonomike.
“Kemi përgjegjësi të veçantë për t’i ndihmuar partnerët tanë në Ballkanin Perëndimor në këtë pandemic, sepse ardhmërie e tyre është e qartë se është në BE”, deklaroi Ursula Fon Der Lejen, kryetarja e Komisionit Evropian.
Mjetet do të shkojnë siç vijon më poshtë:
- 8 milionë euro janë për ndihma urgjente shëndetësore, si maskat dhe ventilatorët.
- 389 milionë euro për masat ekonomike dhe sociale.
- 455 milionë euro për rimëkëmbjen ekonomike në rajon.
- 750 milionë euro për ndihma makro-financiare.
- 1.7 miliardë euro ndihma financiare përmes Bankës për investime evropiane.
Bashkimi Evropian ka siguruar edhe 4.5 milionë euro ndihmë urgjente për refugjatët dhe emigrantët dhe 8 milionë euro për kampet e emigrantëve në rajon.
Për periudhën 2021-2027, Komisioni Evropian propozon që shuma e përgjithshme e instrumentit të jetë 14,5 miliardë euro, pjesa më e madhe e të cilave do të jenë për vendet e Ballkanit Perëndimor dhe propozon rritje të konsiderueshme në garancitë financiare për të mbështetur investimet publike dhe private në rajon përmes vendosjes së instrumentit të posaçëm.